Sermo IV.

Item, sermo fratris Bonaventurae in ecclesia maiori Remensi.

Levantes oculos suos neminem viderunt nisi solum Iesum, Matthaei decimo septimo .

In his verbis describitur status perfectorum ad contemplanda caelestia assumtorum. Quoniam autem via deveniendi in hunc statum est mundi vanitates considerare et consideratas despicere et sic ad speculanda aeterna se convertere; ideo sacer Evangelista in his verbis primo innuit virorum sanctorum circa temporalia considerationem sapientialem, cum dicitur: Levantes oculos suos; secundo subiungit rerum consideratarum dignam abiectionem, curo subditur: neminem viderunt; tertio concludit optimam ex omnibus electionem, cum subinfertur: nisi solum Iesum.

I. Circa primum nota, quod illi qui mundum despicere ordinate volunt, levare debent oculos ad considerationem mundanae vanitatis, qua omnis creatura est mutabilis, quia ex nihilo; Zachariae primo : Levavi oculos meos et vidi, et ecce, quatuor cornua etc.

Ad considerationem mundanae impuritatis, qua omnis homo est culpabilis, quia ex semine foetido; Ieremiae tertio: Leva oculos tuos in directum et vide, ubi non prostrata sis.

Ad considerationem mundanae calamitatis, qua omnis homo est miserabilis, quia conclusus ergastulo; primi Paralipomenon vigesimo primo: Levans David oculos suos, vidit Angelum Domini stantem inter caelum et terram et evaginatum gladium in manu eius etc

II. Verum, quia considerantes mundi vanitatem, impuritatem et calamitatem, non vident, quid sequantur, vel cui innitantur, vel quid intueantur, sequitur: neminem viderunt, quem acceptarent. Ratio huius est triplex: prima, quia omnis fiducia humana decipit propter sui infidelitatem; Ieremiae decimo septimo : Maledictus homo, qui confidit in homine et ponit carnem brachium suum; Iob septimo: Memento , quia ventus est vit a mea , et non revertetur oculus meus, ut videat bona.

Secunda, quia omnis pulcritudo humana inficit propter sui foeditatem;

Proverbiorum ultimo: Fallax gratia et vana est pulcritudo; Iob vigesimo: Oculus, qui eum viderat, non videbit etc

Tertia quia omnis fortitudo humana deficit propter sui fragilitatem; Isaiae quadragesimo : Omnis caro foenum, et omnis gloria eius quasi flos agri; Ecclesiastae quarto: Vidi calumnias, quae sub sole geruntur, et lacrymas innocentum et neminem consolatorem, nec posse renitere eorum violentiae etc.

III. Ceterum quia non sufficit mundum consideratum despicere, nisi quis studeat caelestibus adhaerere; ideo subditur et concluditur, quod Jesum viderunt, id est secuti fuerunt et toto corde approbaverunt; et bene quidem, despecta mundi vanitate, sequendus et amandus est Christus et contemplandus; ipse enim Iesus est lapis angularis, cor humanum stabiliens propter sui firmitatem; ad Ephesios secundo : Ipsosummoangulari lapide Christo Iesu etc.

Lux solaris cor humanum dirigens propter sui veritatem; Ioannis nono: Ille homo, qui dicitur Iesus, lutum fecit et unxit oculos meos etc., et video.

Portus salutaris cor humanum perficiens propter sui bonitatem; Matthaei undecimo: Respondens Iesus, dixit: Confiteor tibi, Pater etc. Venite ad me omnes, qui laboratis et onerati estis, et ego reficiam vos.

Levantes ergo oculos, in consideratione mundanae vanit atis neminem viderunt, cui vellent inniti, nisi I eiuni qui est lapis angularis.

Mundanae impurit atis, neminem viderunt, quem vellent intueri, nisi Iesum, qui est lux solaris.

Mundanae calamitatis, neminem viderunt, quem possent sequi, niti Iesum, qui est portus salutaris .