187. De sancto Berahardo.

1 a. Claro vocis tripudio
Recensemus cum gaudio
Bernhardi sollemnia:

1b. Hic ortus in Burgundia
De nobili prosapia
Claruit scientia.

2 a. Dum esset adhuc iuvenis,
Notis placet et advenis
Pro morum modestia:

2 b. Stupet, tremit, admiratur,
Quantam poenam patiatur,
Qui suffert incendia.

3 a. Pro bac sprevit mundi florem,
Dei crevit in amorem,
Ut dicent sequentia.

3 b. Cistercium expetivit

Ducens secum, quos quaesivit,
Per nota confinia.

4 a. Ingressus monasterium
Laudandum tyrocinium
Egit in ecclesia.

4 b. Studium eius lectio,
Quam regebat oratio
Crebraque suspiria.

5 a. Claram Vallem post mittitur,
Patrum pater efficitur
Utriusque custodia.

5 b. Hac in valle quod dixerit,
Quam clarum opus gesserit,
Mundi novit patria.

6 a. Hinc sacerdos ordinatur,
Ut per ipsum offeratur
Deo placens hostia:

6 b. Gregem commissum aluit,

Se pastorem exhibuit

Patris reverentia.

7 a. Vallem prius parum caram
Re, nomine fecit claram
Deitatis gratia:

7 b. Hanc fundavit, inchoavit,
Quam nutrivit, sublimavit
Ad caeli fastigia.

8 a. Quae dilatavit fimbrias
Plures gignendo filias
Parentis instantia.

8 b. Vigiliarum pondere,
Ieiuniorum onere
Victus et inedia,

9 a. Bernhardus cibo abstinens,
Paene defectum sustinens
In sua vitalia,

9 b. Athletae fortis spiritus
Laborum non est veritus
Sustinere taedia.

10 a. Corpore licet debilis,
Mente firmus et stabilis
Cursus prendit bravia.

10 b. Inter reges et comites
Franciae intra limites
Per hunc fit concordia.

11 a. Fama Bernhardi celebris
Multos traxit de latebris
Ad vitae remedia.

11b. Potens erat in sermone
Verbi monstrans ratione
Futura iudicia.

12 a. Libros scripsit veritatis
Plenos morum sanctitatis
Revelans mysteria.

12 b. Reduxit Innocentium

Papam ad summam urbium
Fugata discordia.

13 a. Surdos fecit [hic] audire,
Mutos loqui, custodire
Divina eloquia.

13 b. Bernardus, lux ecclesiae,
Sidus praefulgens Galliae,
Post aetatis spatia

14 a. Palmam victricem obtinet,
Quem caeli claustrum retinet,
Ubi pax et gloria.

14 b. Meritis eius precamur,
Nos iuvari mereamur
In caelesti curia.

15 a. O patrone singularis,

Qui cum Christo gloriaris,
Illa monasteria,

15 b. Quae fundasti, semper rege,
Clemens custodi, protege
Ab hostis malitia,

16 a. Ut exemplum disciplinae
Custodiant et doctrinae
Cum perenni gratia,

16 b. A te docti qui fuerunt
Qui viderunt, audierunt
Quae facis magnalia.

17 a. Per te, pater ingenitus,
Cum filio paraclitus,
Cui aeterna gloria,

17 b. Hoc praestet eius gratia,
Cuius viget clementia
Saecula per omnia.