189. De s. Johanne Evangelista.

1. Contemplator trinitatis,
Speculum virginitatis,

Johannes apostole,
Protege me supplicantem,
Serva tibi famulantem,

Excelse coelicole;
Funde preces, flecte Deum,
Ut illustret pectus meum,

Ad te mentem erigo,
Ut sim salvus tuo dono,
Totam in te spem repono,

Te patronum eligo.

2. Virgo Dei es electus
Et prae ceteris dilectus,

Gemma pudicitiae,
Vagos stringe cogitatus,
Ut sit salvus in me status

Dei continentiae,
Sensus firma fluctuantes,
Hostes fuga conturbantes,

Reprime daemonia,
Doma mentem, iram frena,
Confer pacem, cor serena,

Aufer adversantia.

3. Cum Jesu recubuisti
Super pectus, ebibisti

Dicta evangelica,
Dum in Pathmos relegans,
Ad superna sublevans,

Contemplaris mystica.
Praeelecte, tu dignare
Delictorum impetrare

Mihi Christi veniam,
Ut sic possim respirare
Et excessus emendare

Consequi et gratiam.

4. O felix evangelista,
Mihi jugiter in ista

Aerumna subvenias;
Sicut matrem Jesu Christi
Commendatam custodisti,

Precor me custodias.
Confer vitae sanctitatem,
Corporis da sanitatem

Et quieta tempora,
Aufer cordis pravitatem,
Purga linguae foeditatem,

Me languentem robora.

5. O lucerna, flos virtutum,
Ductor cernens iter tutum,

Stella lucens saeculo,
Jubar tuae claritatis
Me defendat a peccatis,

Tollat ab ergastulo.
Vitae meae rege cursum,
Post hanc vitam trahe sursum

Animam ad gaudia,
Ubi Deum contemplari,
Justis pie sociari

Merear in gloria.