EXPOSITIO TEXTUS.

Littera sic exponitur (sig. 7) : Et aliter potest assignari causa ejus, quod dictum est, et hic oportet intendere, id est, considerare, duplicem traditionem, etc, id est, dupliciter nobis tradi divina, hanc quidem, scilicet symbolicam, esse secretam et mysticam, quantum ad ea quae ipsi occultantur : illam autem quae per propria tradit divina, apparentem ei notiorem, quia in primo adspectu verba exprimunt quod intenditur per ea significari. Et hanc quidem, scilicet symbolicam, esse significativam, quantum ad symbola : quia sicut dicit Augustinus, " Signum est, quod praeter speciem " quam ingerit sensibus, facit aliquid " aliud in cognitionem venire : " et perfectivam, quantum ad veritatem, quae in symbolis continetur : illam autem, scilicet propriam philosophicam, quia per modum philosophiae procedit ex propriis, et receptivam, id est, approbativam quae in ipsa approbatur, Et dicendo quod de Deo congrue dici potest, complicitum, id est, conjunctum, non dicendum, hoc potest referri ad symbolicam Theologiam, in qua sunt sensibilia quae non sunt dicenda, et figurata quae dicenda sunt : et potest etiam ad. propriam referri, in qua figuratur Deus per suas processiones, quae quidem dicuntur de Deo quantum ad rem significatam eminenter, sed non secundum modum quo nomen significat. Et hoc quidem negotium, quod per pro-

pria divina tradit, persuadet veritatem, quantum ad ipsas conclusiones, et ligat quantum ad. convictiones argumentorum ex principiis fidei : sicut si sint relationes originis distinguentes in divinis, oportet esse plura supposita : illud autem, scilicet symbolicum, operatur discurrendo de proprietatibus sensibilium in spiritualia, et in perfectionibus mysteriorum, id. est, occultatorum in eis, docibilibus quantum ad sensum quem faciunt verba, collocat in Deo, id est, in inspectione divinae veritatis.

Et quia adhuc restat quaerere quare theologicum negotium est dupliciter, ideo subjungit convenienter tertiam causam, quae reddit propter quid hujus : et dividitur in partes duas. In prima manifestat, quod Scriptura utitur symbolis. In secunda significat causam ejus, ibi (sig. 9), Etenim conveniens, etc.

Dicit ergo primo (sig. . 8) quod sancti Magistri nostrae traditionis, id est, Evangelii, sicut Apostoli, et ipse Christus, aut legalis, id est, veteris legis, sicut Prophetae, et alii sapientes, in perfectionibus, id est, in doctrinis divinorum non abstinuerunt, sed usi sunt quibusdam sensibilibus signis, vel aliqua similitudine, Deo convenientibus, ad ipsum significandum : sed et videmus ipsos Magistros mystice producentes, id est, proponentes nobis Angelos per aenigmata divina, id est, per allegorica symbola, quibus consueverunt Deum proponere : et etiam Jesus docet in parabolis quibusdam divina, sicut patet Matth. xiii, 3 et seq.: et tradidit etiam divina mysteria per figurativam caenam, id est, parabolam caenae, sicut patet in Lucae, XIV, 16 et seq. : vel hoc dicit de corpore et sanguine suo, quod discipulis in caena dedit.

Deinde ponit tertiam causam acceptam ex parte animae : et primo ponit causam, secundo probat eam, ibi (sig. 10), Et monstrant quicumque, etc.