192. De sancto Botuido.

la. Caeli chorus, esto gaudens,
Collaetare simul plaudens,
Contio fidelium ;

1b. Noe iustus, vir perfcctus,
Deo placens et dilectus,
Pausat post diluvium.

2 a. Super Sion sanctum montem

Deitatis gustans fontem

Implet desiderium ;

2 b. Ad aeterna iam ascendit
Enoch, David apprehendit
Honoris fastigium.

3 a. Hic convertit peccatores
Ab errore, sanctos mores
Docet salvans animas.

3 b. In radice caritatis
Onus laxat paupertatis
Spargens elemosynas.

4 a. Non est dolor neque luctus,
Ubi dulces metit fructus
Laborans agricola;

4 b. Qui cum Christo gloriatur,
Angelis associatur
Gloriosus incola.

5 a. Rex benigne, Iesu bone,
Nos Bothuidi fac coronae
Fieri participes,

5 b. Ut supernae civitatis
Exsultemus cum beatis
Perennes municipes.