179. Laus Virginis.

1 a. Laus virginis

Nati sonat cum iubilo,
Fraus criminis
Absit culpae
fugato nubilo.

1 b. Parens carens

Originis contagio,
Totis votis
Te carminis

laudat praeconio

2 a. Coetus nostri collegii,
Laetus festo
natalis regii.

2 b. Cedit luctus tristitiae,
Redit per te
fructus iustitiae.

3 a. Praedestinata nosceris

In salutem credentium,

3 b. Sancta priusquam nasceris
In lucem orta gentium.

4 a. A prophetis praecognita
Signorum aenigmatibus,

4 b. Quae decretis es praedita
Donorum charismatibus.

5 a. David semen, stirps regia,
Virga Iesse florigera,

5 b. Virgo, proles egregia

Servans pudoris foedera.

6 a. Tu stella,
Quae bella

Procellarum destituis,

6 b. Maria,
Spem pia

Gratiarum restituis.

7 a. Porta clausa nec pervia,
Orta nobis

qua lux est praevias

7 b. Portus maris periculis,
Hortus clausus
Dei signaculis.

8 a. Signo fons indeficiens

Signatus sancti spiritus,

8 b. Redundari sufficiens

Mundo fluenta caelitus.

9 a. Audi nos,
Dos,

Honoris et flos,
Inter florum

et rosarum milia
Tu primatum

solus possides.

9 b. Vitae pax,
Fax

Amoris verax,
Quae caelorum

regem, nati filia,
Nobis placas,

cui nunc assides.

10 a. Tu es virtutis

Nos trahens exemplum,
In odorem

post te currimus.

10 b. In spe salutis

Ad te, pacis templum,
Trementes ab

hoste fugimus.

11a. Cuius dira nequitia,
Fallax et infidelis,
Seduxit nos ad vitia
Deceptionum telis,

11b. Ut tandem ad supplicia
Secum trahat crudelis,
Ab eius nos saevitia
Semper tueri velis.

12 a. O salus hominum,

Curans nos dextera,

12 b. O lumen luminum,

Illustrans aethera!

13 a. Tu rubus ardens crederis,
Tu vellus Gedeonis,

13 b. Tu arcus sacri foederis,
Tu thronus Salomonis.

14 a. Tu caeli sanctuarium,
Tu clavis paradisi,

14 b. Verbi Dei sacrarium
A patre indivisi.

15 a. Excelsa super sidera,
Tibi cedit natura,

15 b. Nam te virtutum opera
Praesignant in scriptura.

16 a. Tu Iudith fortis,
Hester mortis

In caput sententiam

Convertens Haman pravi,

16 b. Tu Sunamitis,
Ioel vitis,

Sisaris potentiam
Refutans ictu clavi.

17 a. O sancta domina,
Precamur miseri:

17 b. Tu nostra nomina
Fac caelis inseri.

18 a. Nato commenda
Et emenda
Nos consilio,

18 b. In hoc dignare
Gubernare
Nos exscilio.

19 a. A malis erue,
Adversa destrue,
Statum innocuae
Vitae restitue.

19 b. Reatum dilue,
Salutem tribue,
Stola perpetuae
Pacis nos indue.

20 a. Te collaudantes aspice

Nos, decus angelorum,

20 b. Quae dignitatis apice

Tenes arcem caelorum.

21 a. Eia, solari facie

Splendens caeli regina,

21b. Caelestis aula gratiae,
Serva nos a ruina.

22 a. Tu vas virtutum,
Nobis tutum
Esto scutum
Muniens

Ab ira Dei magni;

22 b. Tu forma legis,
Mater regis,
Ductrix gregis,
Uniens

Morte redemtos agni.

23 a. Te cordis studio
Exorat animus,

23 b. Vocis tripudio

Melos hoc canimus,

24 a. Ut nos conducas
Et adducas
Regi Domino,

24 b. Qui regnat tecum
Et tu secum
Sine termino.

25 a. Qui se dedit in pretium
Nostrae redemptionis,

25 b. Det quoque per te praemium
Remunerationis,

26 a. Ut congaudentes
Et plaudentes
Iugiter

Nos unitati trinae

26 b. Laudes pangamus
Et canamus
Dulciter

Regnanti sine fine.

27 a. Sit finis huius carminis
Et cantio finita,

27 b. Quae dicitur Laus virginis.
Christo laus infinita.