194. De sancta Katharina.

1. Ave, virgo speciosa,
Katharina pretiosa,

Costi regis filia,
Cujus vultum et decorem
Concupivit et amorem

Cubans inter lilia.

2. In aetate juvenili
Tui cordis in cubili

Deo fruens dulciter
Ejus cuncta pro amore
Amorosa cum fervore
Mundi spresti fortiter.

3. Quinquaginta superasti
Atque Deo pretiasti

Doctores malevolos
Constrinxistique reginam
Per divinam medicinam
Linquere vaniloquos.

4. Cujus causa, o puella,

Tibi multa sunt flagella

Data per Maxentium,

Sed sprevisti blandimenta

Cuncta prosus et tormenta

Ad salutem gentium.

5. Capitalem nimis dire
Jussa tandem es subire

Et pati sententiam ;
En res mira, pro cruore
Lac manavit miro more
Plebis ad praesentiam.

6. Et accedens angelorum
Multitudo beatorum

Corpus tuum tumulant
Et in coelis multa dona
Super datum esse bona
Animae accumulant.

7. Ergo felix et beata
Katharina, sociata

Angelis in gloria,
Omnes tibi famulantes
Et juvamen postulantes

Habe in memoria.

8. In eorum mortis hora
Adsis cito sine mora

Turbam fugans hostium,
Tibi Deus nam promisit,
Quisque tibi se commisit,

Reddere solatium.

9. Eja, virgo praeelecta,
Duc me tecum in dilecta

Dei tabernacula,
Ubi sequar sine fine
Tecum regis et reginae
Agnum sine macula.