QUAESTIO XC.

Utrum benignitas fuerit in ipsa?

Post haec quaeritur de benignitate quae est, ut dicit Glossa., largitas rerum.

Quod autem illa fuerit in beatissima Virgine in summo, probatur hoc modo :

1. Largitas rerum consistit in dando : sed beatissima Virgo improportionabiliter omnibus dedit: ergo improportionabiliter plus omnibus larga fuit. Minor patet hoc modo : De Deo Patre dicit Aposto-

lus : Qui proprio Filio suo non pepercit, sed pro nobis omnibus tradidit illum, quomodo non etiam cum illo omnia nobis donavit ? Sed Deus dedit nobis Filium generando ipsum secundum divinam naturam, et ejus incarnationem operando: ergo et beata Virgo dedit nobis Filium Ipsum generando secundum naturam humanam, ad ipsius incarnatio- nem carnem virgineam ministrando : ergo et ipsa Filium suum nobis dedit, et in eo nobis omnia contulit.

Item, Beatissima Virgo dedit omne dabile : ergo fuit magis larga omni viatore. Media patet. Omne enim dabile est Deus vel creatura : ipsa autem dedit Deum mundo, et mundum et omnia Deo, De primo dicitur in libro Sapientiae, VII, 12 : Quoniam bonorum omnium mater est. De secundo, ibidem, v. 11 : Venerunt mihi omnia bona pariter cum illa.

2. Item, Psal. l, 20 : Benigne fac. Glossa : " Filium mittendo, et peccata dimittendo. " Sed inter omnes creaturas beatissima Virgo ad Filii missionem et peccati dimissionem sola officium et ministerium exhibet: ergo improportionabiliter plus omnibus dedit et dimisit : ergo improportionabiliter plus omnibus benigna fuit.

3. Item, I ad Corinth. XIII, 4: Charitas patiens est, benigna est. Hae sunt propositiones per se : ergo ubi charitas ma- jor, benignitas major : sed beatissima Virgo in summo habuit charitatem : ergo et benignitatem.

4. Item, Matth. V, 45 : Ut sitis filii Patris vestri qui in caelis est, qui solem suum oriri facit super bonos et malos, et pluit super justos et injustos, Glossa : Benignus, quia dedit eis potestatem filios Dei fieri, his qui credunt in nomine ejus , etc. Sed post Deum beatissima Virgo in summo suo modo dedit nobis filios Dei fieri, per gratiam nos regenerando : ergo post Deum nobis in summo benigna fuit, Media patet : Deus enim dedit nobis potestatem filios Dei fieri, per gratiam regenerando : beatissima autem Virgo dedit nobis potestatem filios Dei fieri, regeneratorem nostrum generando : unde, Luc. II, 7 : Maria peperit filium suum primogenitum. Unum filium secundum carnem genuit, in quo nos omnes secundum spiritum in filios Dei regeneravit .