Sermo III .

Item, sermo fratris Bonaventurae apud Perusium, praesente ibi Curia.

Illa autem quae sursum est Ierusalem libera est, quae est mater nostra, ad Galatas quarto .

In verbis his ad aedificationem nostram commendat Apostolus Ierusalem supernam: primo, a sublimitate superexcellentis gloriae, cum dicit: Illa qu ae sursum est Ierusalem; secundo, a felicitate supersplendentis sapientiae, cum subdit: libera est, ab omni velamine; tertio, a viscerositate gratiae affluentis clementiae, cum addit: quae est mater nostra etc.

I. Circa primum nota, quod civitas, Ierusalem superna, est: gloriosa tentione principalis originis ; ad Hebraeos duodecimo : Civi tatem Dei viventis, Ierusalem caelestem.

Speciosa visione fontalis luminis; Apocalypsis vigesimo primo: Vidi Ierusalem habentem claritatem Dei.

Deliciosa fruitione abyssalis dulcedinis; Tobiae decimo tertio : Portae Ierusalem etc., et per vicos eius alleluia cantabitur.

Opulenta plenitudine universalis consolationis et laudis; Isaiae trigesimo tertio: Oculi tui videbunt Ierusalem, habitationem opulentam etc.

Illa, inquam, dicitur esse sursum: ad venerandum omnipotentialia numina (?); ad Colossenses tertio : Quae sursum sunt quaerite, ubi Christus est in dextera Dei sedens.

Ad contemplandum sapientialia specula; Proverbiorum vigesimo quinto: Caelum sursum et terra deorsum.

Ad possidendum sempiternalia gaudia; ad Colossenses tertio: Quae sursum sunt sapite.

Ad extollendum divina magnalia; Psalmus : Deus noster in caelo, sursum in caelo et in terra .

II. Secundum aliam litteram circa secundum nota, quod Ierusalem superna dicitur esse libera propter nobilem illum volatum et praecordialem impetum, quo Angeli et animae sanctae vera libertate feruntur in Deum; nam feruntur in eum Seraphim et Apostoli ut in fornacem amoris, Cherubim et Doctores summi ut in fontem splendoris, Throni et et Confessores supremi ut in pelagum voluptatis, Dominationes et Martyres ut in dominatorem et creatorem universitatis, Principatus et episcopi summi et alii praelati ut in gubernatorem machinae mundialis, Potestates et Patriarchae et reges mundi ut in Remuneratorem creaturae rationalis, Virtutes et Virgines ut in conservatorem creaturae caelestis et subcaelestis, Archangeli et Prophetae et praedicatores ut in dispensatorem consiliorum suorum, Angeli et ceteri spirituales servi ut in distributorem officiorum et donorum.

Vel dicitur libera civitas superna, quia fervida in Seraphim et Apostolis, limpida in Cherubim et Doctoribus, solida in Thronis et Confessoribus, vivida in Dominationibus et Martyribus, valida in Virtutibus et Virginibus, prompta in Potestatibus et mundi rectoribus, provida in Principatibus et pontificibus et pastoribus, secreta in Archangelis et Prophetis et praedicatoribus, officiosa in Angelis et electis Dei spiritualibus.

I II . Circa tertium nota, quod civitas superna dicitur mater n ostra intercessive, exemplariter, consortive et indicative, condescensive et quietative, quia nos genuit: in Patriarchis fide vera; in Prophetis spe ardua, in regibus in liberalitate superna, in Apostolis in caritate flammea, in Martyribus in magnanimitate virtuosa, in Pontificibus in pietate emerita, in Doctoribus in veritate aeterna, in Confessoribus in humilitate interna, in Virgini bus in castitate intemerata.