197. De sancta Caecilia.

1 a. Choro, chordis plebs, organo,
Cymbalis, psalmo, tympano,
Cithara iucundatur

1b. Pro virgine Caecilia,
Quae rosis inter lilia
Hodie circumdatur.

2 a. Agnum de sponso feroce
Virgo melliflua voce
Fecit mansuetissimum,

2 b. Quem Urbanus baptizavit,
Unctum Christo consecravit
Militem carissimum.

3 a. Coronis latis de caelo
Ferventes pudoris zelo
Angelus redimivit;

3 b. Frater fratrem pia prece
Purgatum deorum faece
Domino adquisivit.

4 a. Ab idolis, daemonibus
Multos sanctis sermonibus
Ad Deum converterunt,

4 b. Quos ad saeva supplicia
Pro fidei iustitia
Pagani tradiderunt.

5 a. Capita ferro truncantur,
Sic in caelis coronantur
Obtenta victoria.

5 b. Virgo flammis concremata,
Ense tandem decollata
Caeli subit gaudia.

6 a. Doctrix, martyr, virgo, nupta,
Mente, carne incorrupta,
Mariae coaequatur;

6 b. Nam triplici laureola
In caelesti aureola
A sponso decoratur.

7 a. O sponsa lucis praeclara,
A nobis Orci amara
Prohibe supplicia,

7 b. Ut mundati a delictis
Coniungamur benedictis
Redemptoris gratia.