200. De sancta Margareta.

1. Ave, virgo Margareta,
Peccatorum via spreta
Lege Dei vere laeta
Meditari sine meta.

2. Ave, mundum quae sprevisti,
Jugum Christi suscepisti,
Ergo, quidquid expetisti,
Margareta recepisti.

3. Ave, clamans exaudita
Nec a malis impedita,
Voces audi nostras ita,
Clara Christi margarita.

4. Ave, virgo, signo Christi
Consignata quae fuisti,
Per quem fortis exstitisti,
Margareta, dum vicisti.

5. Ave, virgo, curans mentes,
Nomen tuum diligentes,
Margareta, fac ferventes,
In amore te sequentes.

G. Ave, sanans tu languorem
Infirmorum et dolorem,
Virgo, Dei per amorem
Iram pellas et furorem.

7. Ave, rosa castitatis,
Judex justus veritatis
Tuae testis puritatis
Te servavit a peccatis.

8. Ave, virgo spes moestorum,
Margareta, lux mundorum,
Viam spernis mundanorum,
Vitam gerens angelorum.

9. Ave, virgo derelicta
Ab amicis, sed relicta
Jesu Christo benedicta,
In tormentis non devicta.

10. Ave, virgo, Dei sedes,

Nos supernas duc ad aedes
Fac nos Christi cohaeredes,
Ubi cum dilecto sedes.

11. Ave, virgo gloriosa,
Margareta generosa,
Lingua fallax et mendosa
Nos non tangat et dolosa.

12. Ave, virgo, ne in morte
Obsint nobis mortis portae,
Lumen nobis dona forte
Et a mala duc cohorte.

13. Ave, virgo, salutare

Christi nobis fac adstare,
Ut cum sanctis exsultare
Valeamus et cantare.

14. Ave, virgo, te rogemus,
Mala mundi ne gustemus,
Post te coelum ut intremus
Et cum sanctis habitemus.