200. De sancta Clara.

1 a. Ave, virgo felix Clara,
Dominarum lux praeclara,
Quam Franciscus genuit.

1b. Ave, mater egenarum

Prima Christo reclusarum,
Quibus mundus viluit.

2 a. Ave, summae paupertatis
Praeclarum principium ;

2 b. Ave, mirae caritatis

Praecellens exordium.

3 a. Ave, cuius caritas
Et simplex humilitas
Christo dant hospitium;

3 b. Ave, cuius dignitas
Et ortus nobilitas
Decorant Assisium.

4 a. Ave, pauperum lucerna,
Cui dedit vis superna,
Oleum, cum defuit;

4 b. Ave, Christus quam adfari
Atque pie consolari
Viva voce voluit.

5 a. Ave, sanctarum praefulgens
speculum ;

5 b. Ave, splendor clarificans
saeculum.

6 a. O quam mirabile
Et quam laudabile
Est hoc collegium,

6 b. In quo per spiritum
Christo fit debitum
Frequens obsequium,

7 a. O quam clemens, quam benigna,
Quanta Clara laude digna
Apud Christum credituri

7 b. Per quam hostis removetur,
Et libertas indulgetur,
Dum Iesu colloquitur.

8 a. Ave, per cuius meritum
Panis augetur virginum
Defectum patientium.

8 b. O quam fulgens miraculum
Conventus est humilium
Per Clarae patrocinium!

9. Supplica, Maria, nato,
Ut nos mundet a peccato
Et post vitae huius cursum
Nos post Claram ducat sursum
Ad superna gaudia.