204. De sancta Christina.

1. Ave, virgo tu Christina,
Ave, dulcis et divina,
Ave, sponsa Christi vera,
Ave, mitis et sincera.

2. Martyr Dei, Deo digna,
Tua prece me consigna,
Preces audi peccatoris
Et me mundes intus, foris.

3. Preces audi, praesta votum,
Cor in bono fac immotum,
Confer mihi cor contritum,
Rege visum et auditum.

4. Rege gustum et olfactum,
Virgo sancta, rege tactum,
Ut in cunctis te regente
Vivam Deo sancta mente.

5. O sancta martyr Christina,
Babylonis de sentina
Mihi tutum da ducatum,
Christum Iesum fac placatum.

6. Esto mihi consolatrix.
Pro me sis interpellatrix,
Pro me Christum interpella,
Solve mortis de procella.

7. Superare me fac mundum,
Ne demergar in profundum,.
Me non sinas naufragari
In peccatis in hoc mari.

8. In conspectu potens Dei,
Memor esto, precor, mei,
O servitrix Christi fortis,
Esto praesens hora mortis.

9. Decumbentem fove, leva
Et de morte solve saeva,
Ut resurgam novus homo,
Civis in caelesti domo.