204. De sancto Cuniberto.

1 a. Agrippina sancta, gaude,
Sanctitatis novo plaude
Decorata speculo,

1b. Cum accedit Cunibertus
Tibi rector, doctor certus,
Novum sidus saeculo.

2 a. Cultu cuius es ornata,
Stas doctrinis regulata,
Fulges patrocinio.

2 b. Clara puer domo natus,
Aulae regis commendatus,
Claro fervet studio.

3 a. Caritate stimulatus

Servis servit Deo gratus,
Omnibus se tribuens;

3 b. Libertatis iura mutat,
Dum servile nil refutat,
Nil abiectum respuens.

4 a. Lapsa luce dum labori

Cedens membra dat sopori,
Visitatur caelitus.

4 b. Luce magna teste rege
Prolem nati sibi lege
Rex adoptat inclitus.

5 a. Literis hinc institutus
Sacris altis est imbutus
Ab alto virtutibus,

5 b. Spiritalis disciplinae,
Sanctitatis et doetrinae
Factus norma plebibus.

6 a. Levitarum Trebatinis
Datus primas Agrippinis
Mox fit archos praesulum.

6 b. Caput ornat sacerdotis
Spiritalis gemma dotis,
Columbae spectaculum.

7 a. Pie pater, Cuniberte,

Per te nobis sint apertae
Portae caeli, postula ;

7 b. Sortis tuae fac consortem
Tui gregis hanc cohortem
Per aeterna saecula.