189. De Condicione Humana

1. In hoc vitae stadio
Diversa conditio

Carnis est humanae,
Agit hic in vitiis,
Ille in divitiis,

Et hic eget pane;
Mors ut ponit metas,

subit omnis sexus et aetas,
Cum mors quemque ferit,

quis modo tutus erit?

2. Concludit in tumulo
Mors multos ex cumulo

Populi frequenter,
Occultat in pulvere
Divitem cum paupere

Tunc indifferenter ;
Factis vel verbis,

homo simplex, unde superbis?
Nam, si credideris,

tu cito pulvis eris.

3. Bella movent plurima
Mundus et daemonia

Carnem infestantes,
Vulnus suffert anima,
Ex eisdem saucia

Clamant hoc gustantes:
Pace frui plena

cupiens de sorde refrena
Carnem, mortiferis

ne pareat vitiis.

4. Sursum mentem erige,
Tua facta corrige

In hac vita dura,
Labili ac flabili,
Debili ac flebili,

Cito transitura ;
Sentit adhuc proles,

quod commisere parentes ;
Hinc tua facta rege

nec mala corde tege.