205. De sancto Cuthberto.

1 a. Splendor Christi sacerdotis

Et vicinis et remotis

Praeminet cum gloria;

1b. Lnx Cuthberti fulget late

Corporis integritate

Nec est transitoria.

2 a. Incorrupta vernat caro,

Quam decore rex praeclaro

Caelestis magnificat;

2 b. Cuius festum caelum plaudit,

Cuius terra laudes audit,

Aspicit et praedicat.

3 a. Parvuli triennis ore

Pontificali decore

Ornandus asseritur.

3 b. Angelo docente Dei

Caelo missa salus ei

In genu perficitur.

4 a. Pene mersos in profundo

Prece sancta, corde mundo

Littori restituit.

4 b. Animam ad caelos vehi

Aidani, viri Dei

Cernere promeruit.

5 a. Panes nivei candoris

De supernis vidit oris

Tres allatos caelitus,

5 b. Quos per angelum de caelis

Ministrari vir fidelis

Adplaudit medullitus.

6 a. Belluae, dum de profundis

Gradiuntur maris undis,

Illi dant obsequia.

6 b. Futuri diem sereni

Praedicit sermone leni

Vi praeclusis noxia.

7 a. Lympham sibi Deus dedit,

Eremita quo resedit,

Ex humi duritia.

7 b. Regem cito morituram

Seque praesulem futurum

Certa dat indicia.

8 a. Quem ab arbore cadentem

Caelos vidit ascendentem,

Eius narrat praemia.

8 b. Christi mysticis refectus

Sacramentis et protectus

Transit ad caelestia.

9 a. Sunt miracula perplura,

Obsistente quae natura

Per hunc fiunt inclita.

9 b. Haec ad laudem Dei currunt,

Abdita nec delitescunt

Sancti viri merita.

10 a. Integris in urna pannis

Quadringentis decem annis

Et octo dormierat;

10b. Nec putredo, nec vetustas,

Immo splendor et venustas,

Illum circumdederat.

11a. Caput, tuum, rex Oswalde,

Vir dilectus Deo valde

Hac theca servaverat,

11b. Et Bedae, sancti doctoris,

Qui caelestis est odoris,

Ossa recondiderat.

12. a Fragrans odor supernorum

Hos perfudit balsamorum,

Qui praesentes aderant,

12 b. Qui in carne Dei virum

Incorruptum, dictu mirum,

Cernere meruerant.

13. Odor ergo nos caelestis

Comat moribus honestis,

Ut fruamur caeli festis

In sanctorum gloria.