209. De sancto Cuthberto.

O decus Anglorum, titulis pollens meritorum,
Mi Cuthberte pater, pronis pius, hostibus acer,
Te mihi suspiro, te spe, prece, mente requiro.
Novimus, alter erit, tua qui suffragia querit,
Tristis letatur, flens ridet, egensque beatur.
Nunc hilaris maesto, misero miserator adesto.
Sum maestus plane, quod vixi, fugit inane,
Fugit enim, dixi, vita nil utile fixi.
Quantum peccavi ! flens crimina post iteravi.
Quae bona, quae liqui, nil detestatus iniqui?
O me peccantem I sprevi peccando tonantem,
Quem quotiens sprevi, me de caelis abolevi.
Exosus caelo, terrae, cur vivus anhelo?
Postponens Christum delegi mortis abyssum,
In barathri fundum mergit scelus omne profundum.
Horreo, peccantem me dico, tanta patrantem,
Non fero me talem, me conspiciens animalem.

Fonte Dei lotus renovabar et unguine fotus,

Splendidus exivi, sed post sordes repetivi.

Vae michi, peccavi, culpas culpis cumulavi!

Vae michi, quo vadam? novus in me decidit Adam,

Ingemino vae, vae, repeto vae filius Evae.

Non tolero memet, nec possum linquere memet.

Tu locus effugii, pater, es, patiaris adiri,

Huc magis ipse cito, miseri miserendo venito.

Respice languentem, peccavi, morte paventem,

Exora Iesum, velit me visere laesum.

Saucius ex telo culpae medicamen anhelo.

Fer, precor, antidotum, medicus, medicina dolorum.

Porrige, quaeso, manum, facias mox surgere sanum,

Porrige, quo mundum reddat, baptisma secundum.

Spes mea post Christum, prece pellas omne sinistrum,

Oro, iuvare velis, et mox tibi stabo fidelis.

Posce mihi flatum, quondam tibi mystica fatum,

Quae puer octennis perdiscis ab ore triennis.

Ut te de caelis Raphael, me trade medelis,

Dans nautis portum fac, tendam pacis ad ortum,

Orans intente, transcendens terrea mente,

Quo tu tendebas, sanctum transire videbas,

Fac, ut eo tendam, dum morti iura rependam.

Te, pater insignis, daemon expavit et ignis

Te, fugiant per te Satanas, Tenus, hostis uterque.

Pastus ut in terris paradisi pane referris,

Fac, vivi panis nunquam mea mens sit inanis.

Orans, praeclicens, praesens, absens benedicens,

Potu, pane, manu, cruce, chrismate, munere, tactu

Morbis marcentes subito das ire valentes.

Aegrum peccatis relevato, pater pietatis,

Me repares, queaso, fer opem, pater optime, laeso.

Respice prostratum, culparum mole gravatum,

Stabo sanatus, si vis audire rogatus.

Quod vis, fac velle, procul a me cetera pelle,

Velle, quod odisti, da vivam victima Christi,

Vivam non mundo, sed caelis sine secundo.

O cui te credis secretae gratia sedis,

Te bene, te novit, secretius abdita fovit,

Quae solvi carne te viderat inclita Fame.

Sancte Dei civis, melius post funera vivis,

Sanctus cum sanctis felicior ore tonantis,

Sanctus sanctorum tua pars, tua palma laborum.

Suscipe vota precum, peto, fac me vivere tecum.

Dic, rogo, dic amen, dic consummendo precamen.