Sermo II .

Sermo fratris Bonaventurae in domo Fratrum Praedicatorum Parisius, coram Universitate.

Egredimini et videte, filiae Sion, regem Salomonem in diademate, quo coronavit eum mater sua in die desponsationis illius et in die laetitiae cordis eius, Canticorum tertio.

Hodie mater, Iudaeorum synagoga, Christum Iesum honoravit ut regem, ut prophetam, ut pontificem. Ideo sancta mater Ecclesia, processionaliter haec omnia repraesentans cum ramis palmarum filiis suis proponit verbum praefatum, ut, si velint obsequi Christo regi , egrediantur a deformitate peccati; si velint assistere Christo doctori, adaptent mentes aeternae Sapientiae luci; si velint offerre Christo pontifici, collaudent ipsum in templo Dei et adorent ipsum in loco sacrificii. Non enim honorare potest Christum qui non estextra peccatum, nec audire verbum eius qui habet oculos ad mundum, nec offerre Christo qui adhuc offert diabolo. Monemur ergo his verbis ad tria, scilicet ad desertionem deformitatis omnimodae, ut possimus habere sinceritatem conscientiae, ibi: Egredimini, filiae Sion; ad contemplationem speciositatis regiae, ut possimus habere claritatem sapientiae, ibi: et videte regem Salomonem; ad exhibitionem laudis et magnificentiae, ut possimus habere suavitatem gloriae, ibi: indiademate etc.

I. Circa primum, quomodo vel a quibus debemus egredi et quomodo possimus esse filiae Sion, quaere in Vigilia Nativitatis Domini in sermone de eodem themate .

I I. Circa secundum nota, quod hodie in nostro vero rege Salomone habemus videre et considerare tria, scilicet humilitatem apparatus , quia venit ut pauper sedens super asinam ; Lucae decimo: Beati oculi, qui vident quae vos videtis.

Benignitatem aspectus, quia venit ut rex mansuetus , praetendens gratiam; tertii Regum decimo: Universa terra desiderabat vultum Salomonis.

Caritatem affectus, quia venit ut pro omnibus immolandus ad victimam ; Ieremiae secundo: Videte verbum Domini: Nunquid solitudo factus sum Israeli, aut terra serotina? Quare ergo dixit populus meus: Recessimus etc.

Debemus considerare in Deo praestantissimo, quod, licet venerit humilis benignus et caritativus tamen ipse est rex : naturalissimus per essentialitatem excellentiae in praesidendo; Apocalypsis decimo nono : Habet in vestimento et in femore suo scriptum: Rex regum et Dominus dominantium.

Gratiosissimus per largitatem beneficentiae in communicando; primi Machabaeorum primo : Vocavit rex Alexander pueros suos nobiles, qui secum erant nutriti a . ''iuventute, et divisit illis regnum suum.

Rationabilissimus per aequitatem iustitiae in retribuendo; Ecclesiastici primo : Unus est altissimus Creator omnipotens et Rex potens, sedens super thronum illius et dominans Deus. ''

Quia ergo, cum esset rex naturalissimus, venit humillimus, debemus sibi hodie timorem reverentiae per capti vatio nem intellectus; Proverbiorum vigesimo quinto : Ne gloriosus appareas coram rege, et in loco magnorum ne steteris.

Gratiosissimus, venit benignissimus, debemus sibi amorem benevolentiae per inflammationem affectus; Proverbiorum vigesimo secundo: Qui diligit cordis munditiam propter gratiam labiorum suorum habebit amicum regem.

Rationabilissimus, venit obsequiosus, debemus sibi totaliter impendere usque ad mortem per exsecutionem effectus; Psalmus: Laetetur Israel in eo qui fecit eum .

III. Cirta tertium nota, quod videre et considerare habemus Christum in quadruplici diademate, sive corona coron atum , scilicet carnea, qua coronatus fuit a Matre in utero, et haec corona contexta fuit ex virtutibus et donis omnibus; Apocalypsis duodecimo : In capite eius corona etc.

Spinea, qua coronatus fuit a noverca synagoga in crucis patibulo, et haec corona contexta fuit ex peccatorum nostrorum aculeis multiformibus; Ioannis decimo nono: Portans coronam spineam.

Gemmea , qua coronatus fuit a Patre in resurrectionis trophaeo, et haec fuit contexta ex praemiis et margaritis caelestibus; Psalmus : Posuisti in capite eius coronam de lapide pretioso.

Aurea , qua coronatus fuit propter conversionem multorum in mundo, et haec fuit contexta ex filiis Virginum et rosis Martyrum et violis Confessorum et ceteris gradibus Sanctorum diversis; Ecclesiastici quadragesimo quinto: Corona aurea super mitram eius, expressa signo sanctitatis et gloria honoris.