208. De sancto Dionysio.

1 a. Ave, pater Galliae,
Totius ecclesiae

Iubar, lux et speculum ;

1b. Doctorum egregie,
Sapientum Graeciae
Nobile spectaculum.

2 a. Supra caeli cardinem
Dei celsitudinem

Attingens prae ceteris,

2 b. Loquens super hominem,
Naturam, vim, ordinem
Angelorum diceris.

3 a. Oris eloquentia
Perit idolatria,

Christo plebs acquiritur.

3 b. Animi constantia
Irati vesania
Sisinii vincitur.

4 a. Oratis, furni, verberis,
Crucis, ferae, carceris
Poenas omnes despicis.

4 b. Securi percuteris,
Caput ferre cerneris
Hymnis cum angelicis.

5 a. Assueta laudibus
Videbatur motibus

Lingua laudans Dominum.

5 b. Martyr, tuis precibus
Iunge caeli civibus

Nos post vitae terminum.