193. De Mundi Malitia.

1. Nunc floret mendacium,
Pravitatis consortium,
In mundo diliguntur,
Qui falsa obloquuntur,
Veritas mutabitur,
Et fides desolabitur,
Amabitur nequitia,
Disperditur iustitia,
Prava avaritia
Iam et vana gloria

In cunctis malignatur,
Si tibi sit iustitia,
Iam mundi saevitia
Male te tristatur.

2. Fraus donis coronatur,

Virtus suppeditatur,
Pietas et felicitas
Est tamquam bestialitas,

Indignus recipitur,

Egenus vero premitur,
Mammon, usura Satanae,
Sunt cura praecipue,

Iura renuerunt

Iam et bona diviserunt,
Mala reponuntur.

Heu, studii moralitas,

Vigoris quippe bonitas
Lapsum patiuntur.

3. Tunc vis virtutis viguit,

Discipulus dum timuit
Doctorem cum pudore,
Sed iam addiscunt more

Mala propagare

Nec volunt nunc amare
Artis incrementum,
Fit ergo detrimentum

Praefatae disciplinae,

Mores dant ruinae,
Sensu abutuntur.