212. De sancta Dorothea

1. Gaude, virgo Christo grata,
Dorothea sic vocata
Disponente Domino.

2. Gaude, virgo gratiosa,
Dorothea speciosa,
Deitatis gratia.

3. Gaude, virgo, te quaerenti
Et sincere diligenti
Certa das tripudia.

4. Gaude, dulcis advocata,
Caeli serto coronata,
Ardens ut carbunculus.

5. Gaude, splendens pulchritudo,
Virginum tu claritudo
Ad instar carbunculi.

6. Gaude, virtutum area,
Urbe nata Caesarea,
Tu a me pelle vitia.

7. Gaude, maestis es solamen
Miserorum et velamen
In saeclo naufragantium.

8. Gaude, decus humilium,
Mihi confer auxilium,

Et pro me ora Dominum.

9. Gaude, quanta impetrasti,
Ictus ensis dum sperasti,
Sub praefecto Fabricio.

10. Gaude, cuncti ablutricem
Scelerum, te assistricem
Sciant mortis periculo.

11. Christi dona visionem,
Peccatorum tersionem,
Veram cordis compunctionem,

12. Dei matris praesentiam,
Tuamque apparentiam,
Duc nos ad Dei gloriam.