210. De sancto Michaele.

1. Christiane vir fidelis,
Qui regnare vis in caelis,
Saepe recordari velis
Gloriosi Michaelis,

Principis ecclesiae;
Hic defensor animarum
Crucifixo devotarum
Et susceptor est earum
Ad cocleste jubar clarum

Paradisi gloriae.

2. Istum principem decorum
Et primatem angelorum
Laudet chorus electorum,
Qui vult esse gaudiorum

Particeps coelestium.
Habeamus istum talem
In patronum specialem,
Ut nos ducat ad regalem
Mansionem aeternalem

Supernorum civium.

3. Michael, o princeps bone,
Qui pugnasti cum dracone,
Fac nos fortes in agone,
Ut in Dei visione

Laetemur in patria.
Tu pro nobis omni hora,
Sancte Michael, exora,
Ut post mortem sine mora
Nos perducas ad decora

Sempiterna gaudia.