211. De s. Domnino Milite M.

1 a. Turba nunc fidelium
Moveat tripudium
Sollemni laetitia;

1b. Novum parit gaudium
Domnini martyrium
Et felix victoria.

2 a. Hic cubicularius
Regis et primarius
In eius palatio,

2 b. Christo tamen deditus
Ac divinae subditus
Fidei servitio,

3 a. Non consensit colere
Deos nec incendere
Tura manu propria;

3 b. Nec ullis doloribus
Cessit aut erroribus
Martyris constantia.

4 a. Imperator acrius
Instat et immitius
Christi leges tollere
Ac fidem destruere.

4b. Quingentorum igitur

Turba fratrum quaeritur,
Sed inventa libere
Fidem coepit promere.

5 a. Non tormentis
Status mentis
Infirmatur,
Ant mutatur

Martyrum constantia;

5 b. Nam Domninus,
Martyr dignus,
Consolatur
Et hortatur,

Ut ferant supplicia.

6 a. Christi testes immolantur
Et quingenti iugulantur
Communi sententia.

6b. Ipse martyr venerandus
Collum tendit feriendus
Summa cum laetitia.

7 a. Non humana facultate,
Sed divina potestate

Domninus, martyr inclitus
Et miles non demeritus,

7 b. Caesus ipse mox perrexit
Atque suum caput vexit
Trans flumen, ubi positus
Signis claret divinitus.

8 a. Nam et corpus incorruptam
Custoditur et virtutum
Signa florent, et refulgent
Undique prodigia.

8 b. Pie martyr, spes tuorum,
Nos defende vitiorum,
Sic educas et perducas
Ad caeli fastigia,

9. Ubi laeti cantemus Alleluia.