196. De Temporum Iniquitate.

1. Ieremiae prophetiae

Stilus nove pingitur,
Hierarchiae, matris piae,

Vox in Rama gignitur
Ululatus et ploratus

Prae maerore filiae,
Nam affatus nec solatus

Hanc vir est clementiae.

2. Nam Rachelis gens crudelis

Natum sudat sternere,
Ventis, velis, fraudis telis

Quosque vult perimere,
Nunc raptorum, exactorum,

Qui placent in curia,
Dominorum oppressorum

Tollunt res cum furia.

3. Fraus Herodis pravis modis

Toti terrae imperat,
Fidem frangit, captus plangit,

Nova lex exsuperat,
Maior cedit et obedit,

Minor senem arguit,
Schisma cedit, retrocedit

Lex, quae prius placuit.

4. Poena iacet, culpa placet

Cleris, servis, dominis,
Iusti degunt, stulti regunt

Cunctis mundi terminis,
Conculcatur, enervatur

Clerus et religio,
Quisnam scivit vel audivit

Tot rivos a vitio !