198. De Temporum Iniquitate.

1. Mars praecurrit in planetis.
Homo pacis et quietis

Nil valet in saeculo,
Sed tyranni et feroces,
Qui ad mala sunt veloces,

Hi regnant in populo.
Effrenes et indomiti,

Qui devastant et incendunt,

Quae sunt sua, non attendunt,
Tales placent comiti.

2. Ducunt vaccas, equos, boves,
Capras, hircos, porcos, oves

Et, si quae similia;
Ducunt lanam atque linum,
De rapinis implent sinum,

Nudat matrem filia.
En, index ante ianuam

Clamat: redde, quae tulisti,

Vel peribis casu tristi
Mortem per turpissimam.

3. Iesu Christe, fili patris,
Confer nobis iam renatis

Tuum sanctum spiritum.
Quid prodesset nobis nasci,
Si tu velles, rex, irasci,

Ad nostrum interitum!

Memento, quod sumus tui,
Tu es factor, nos factura,
Tibi sit pro nobis cura,

Te precamur cernui.