215. De sancta Sitha.

1. Salve, sancta famula,
Sitha, Jesu Christi,
Quae cum tota anima
Deo placuisti.

2. Egenos et flebiles
De cibo pavisti,
Semper elemosynam
Dere consuevisti.

3. Caecos, mutos, debiles
Et claudos juvisti,
Deum et ecclesiam,
Virgo, dilexisti.

4. Fraudem et nequitiam
Tu nimis odisti,
Para nobis gloriam,
Quam tu meruisti.

21C. De sancto Sixto.

1. Ave, pater et domine,
Sixte, te Dei nomine
Imploro, ne me deseras,
Sed pro me preces offeras.
Altissimo, ne peream,
Sed hostibus praevaleam
Cunctis et in virtutibus
Per te perorner omnibus.

2. Ave, pater omnis orbis,
Pie Sixte, adsis, morbis
Nostris pie miserere,
Fac utroque nos gaudere
In anima et corpore
Nunc et in omni tempore,
Sed praecipue peccatis
A nobis procul fugatis.

3. Ave, decus Graeciae,
Flos exortus ab Athenis,
Prius philosophiae
Scriptis, mundi pompis plenis,
Sixte, qui floruisti,
Sed ipsas reliquisti
Teque subdidisti
Suavi jugo Christi.

4. Ave, dulcis domine,
Tibi cupio placere,
Hinc in Jesu nomine

Te exoro, miserere
Nunc mihi peccatori,
Qui tibi preces fundo,
Non me permittas mori
Peccatorum profundo.

5. Ave, Sixte peroptime,
Post Petrum papa septime,
Per quem septenum numerum
In te virtutum cumulum
Completum esse novimus,
Unde potes, quod petimus,
Nobis et cunctis subditis
Prodesse sanctis meritis.

6. Ave, martyr et pontifex,
Virtutum potens artifex,
Sixte, praesul Romanorum,
Hinc fidelium cunctorum,
Sed nobis specialis,
Qui degimus sub alis
Tuis, quis confovemur,
Adesto, ne damnemur.

7. Ave, Sixte beate,
Praedulcis et amate,
Qui tibi supplicamus,
Fac tecum gaudeamus
In summis coelorum
Per saecula saeculorum.