216. De sancto Eskillo.

1 a. Hac in die gloriemur
Et devote veneremur
Eskilli sollemnia,

1b. Qui pro fide lapidatus,
Iam a Christo sublimatus,
Residet in gloria.

2 a. Transit rigor hiemalis,
Novus floret flos vernalis
In salutem gentium;

2 b. Error cedit, sublimatur
Christi fides, augmentatur
Numerus fidelium.

3 a. Dum pagana gens honorat
Deos, Deum praesul orat
Signum dari caelitus.

3 b. Mox nix, grando descendentes,
Deos, aras subvertentes
Destruxerunt penitus.

4 a. Hostes sternit vis Samsonis,
Lampas lucet Gedeonis,
Dum praesul occiditur.

4 b. Infideles victi credunt.

Aegri clamant et accedunt,
Quibus salus redditur.

5 a. Nos aegrotos prece sana,
Quos impugnant caro vana,
Mundus et daemonia.

5 b. Pater, tutor, dux Sueorum,
Nos concives fac sanctorum
In superna curia.