200. De Scholaribus.

1. Scholares, convenite,
Libenter haec audite

Procul a vitio,
Tractabo vobis rite,
Quae, qualis vestrae vitae

Constet condicio.
Nam primitus barbati,
In facie rugati

Stabant rigoribus,
Vix volunt ablactati
Iam esse subiugati

Suis doctoribus.

2. En, quondam timuistis
Magistros, dum sedistis

Vos in pulveribus;
Tunc certe profecistis,
Cum subditi fuistis

Scholae verberibus.
Omne caput languescit,
Dum pastor oves nescit,

Ac errans erit grex;
Latinum iam recessit,
Barbaricum accrescit,

Scholarum perit lex.

3. Scholaribus revera
Pecunia in pera,

Quinterna manibus,
Et capitis in sphaera
Mitra fulget sincera

Modis in omnibus.
Vix sciunt G, ut, A, re
Nec Musa declinare

Nec curant studium,
Sed discunt chorizare,
Incipiunt amare

Mundi tripudium.