221. Oratio Regis Anglorum.

1. Rex cunctorum saeculorum,
Rex arcis aethereae,
Rector poli, rector soli,
Regum rex altissime.

2. Qui et maris dominaris,
Conturbas et exitas,
Et, cum placet, stratum jacet,
Motum ejus mitigas.

3. Tu creasti, tu formasti
Coelos, terras, maria,
Quae fecisti, condidisti,
Tu gubernas omnia.

4. Omne bonum tuum donum,
Omnipotentissime,
Cuncta grata tua data,
Dominorum domine.

5. Hos coronas atque donas
Gloria multiplici,
Qui in mundo corde mundo
Vita vivunt simplici.

6. Hi beantur, coronantur
In superlunaribus,
Quorum mentes sunt ferventes
Igne sancti spiritus.

7. Peccatorem, adjutorem

Qui non ponit Dominum,

Exaltatum, elevatum
Super cedros, Libanum,

Infernalem, gehennalem
Demergis in clibanum.

8. In Averni, in inferni
Tenebroso carcere

Habes clausos reos, ausos
Te Deum contemnere.

9. Ibi rei jussu Dei

Pro forma sententiae,
Lugent, rigent, ardent, frigent
Et torquentur undique.

10. Ibi metus, ibi fletus,
Ibi stridor dentium
Ibi poenae, omnes plenae
Vocibus gementium.

11. Hic dolores acriores
Aliis doloribus,
Hic tortores nequiores
Aliis tortoribus.
12. Deus meus, ego reus
Tibi me bumilio,
Deus vere, miserere
Adoptivo filio.
13. Supplex tuus, servus tuus,
Deus clementissime,
Te adoro, te imploro,
Tuae donum gratiae.

14. Rex coelorurn, me, Anglorum
Dictum regem, suscipe,
Regem rege, sua lege
Qui se nequit regere.

15. Est regnare, ministrare
Toto tibi animo,
Obedire et servire
Tuo sub imperio.
16. Tuus miles actus viles

Declinem peccaminum,
Incentiva rediviva

Exstinguam libidinum,
Falsa laeta consueta
Devitem excessuum.
17. Non procuro corde puro,
Quod te Deum diligam,
Parvipendo, vix attendo,
Quomodo me habeam.
18. Hujus lucis in caducis
Rebus nimis glorior,
Inpeccatis supra satis
Immorans immorior.

19. Aberravi et peccavi,
Fateor me, Domine,
Temera vi violavi
Jura castimoniae.
20. Patuerunt, putruerunt
Cicatrices criminum,
Aestimati, similati

In lacum descendentium.

21. Honestatis, castitatis
Legem fregi tutius,
Est sopita mea vita
In malis diutius.
22. Me immundum non secundum
Peccata corripias,
Qui elatos vulneratos
Hos et hos humilias,

23. Sed correcto et respecto
Tua, Deus, gratia
Te laudare et amare
Da mihi coelestia.

24. Emundare, emendare,
Quac commisi omnia,
Spem salutis, rem virtutis,

Vitae innocentiam,
Castitatis, puritatis
Dona mihi gratiam.
25. Cum in ira mente dira
Interdum efferveo,
Deus care, moderare
In me, quod non valeo.
26. Nec sit cura mihi, jura
Cuicumque tollere
Vel suorum vicinorum
Terminos revellere,
Licet censu, armis, sensu
Queam hos devincere.

27. In Bragmani, in pagani
Regis est apicibus
Quod habemus, possidemus,
Quaecunque non cupimus.

28. Urbes illas, castra, villas,
Nisi prius cupiam,
Non abesse vel deesse
Eas mihi sentiam.

29. Regum turres, pauperum res
Simili interitu,
Opum plenus et egenus
Aequo cadunt obitu.

30. Regni sedes da haeredes
Meos pro me scandere
Et pacatum regni statum
Te tutante regere.

31. Meum clerum da sincerum
Fas et jus eligere
Et devota mente tota
Te Deum diligere.

32. Vivant ita bona vita,
Ut tibi complaceant,
Nobis normam atque formam
Vivendi se praebeant.

33. Populique mei quique
Commissi regimini
Dirigantur et subdantur
Tuo moderamini.

34. His intende, hos defende,
His te praebe clipeum,
Sceptrum tuum, regnum tuum,
Dominaris gentium.

35. Aufer bella et flagella
Tuae iracundiae,
Nobis parce, hostes arce,
Pacem nobis tribue.

36. Est humana virtus vana,

Scis, quod est in homine,
Nam in parvis nostris armis
Non salvamur, Domine.

37. Saepe nisa et confisa
Sequelis auxilii
Retro vadit, in se cadit
Vis expers consilii.

38. Sed de throno tuo dono
Virtus adest coelica,
Per quam datur, procuratur
De hoste victoria,

39. Nostra sata duplicata
Nos fruge laetificent,
Nostra culta messe multa
Copiam multiplicent.

40. Sic utamur, sic fruamur
Bonis temporalibus,
Ut laetemur, jucundemur
Tecum in coelestibus.

41. Et meorum propinquorum
Miseratus animas
Has absolve et revolve
Delictorum maculas.

42. Vivis cunctis et defunctis,
Domine, fidelibus
Da paccatam et beatam
Vitam in coelestibus.