222. Lessus Poenitentiae.

1. O mi custos, o mi heros,
mi pater misericors,
Flecte, precor, ad me tuos

miseranter oculos,
Lucem super omnem pulchros,
super solem splendidos.

2. Tuque, mi redemptor, Christe,

fili patris optime,
Dignare tuo cum patre

me, quaeso, respicere,
Ut respectus possim fiere

miser amarissime.

3. Tuque, spiritus o sancte,

pie mi paraclite,

Qui ex patre filioque

procedis assidue,
Me tuo misellum more
conturbandum commove.

4. Novi namque, me pecasse
coram te gravissime,
Sicut die, ita nocte,
corde, ore, opere,
Laboravi semper valde
te, Deus, offendere.

5. Laboravi, inquam, valde
plura mala facere,

Quam sint homines in orbe,
quam astra in aethere

Vel quot pisces intra mare,
Arena in litore.

6. Volo unde nunc lugere,

sed non possum, Domine,

Sine te quivi peccare,
sed non possum plangere,

Sine te sum lapsus male,
sed non possum surgere.

7. Non enim possum plorare
nec lamenta fundere,

Potui multa patrare
qui mala quotidie,

Quorum soli patet tuae
numerus sententiae.

8. Caro ita quidem mea
sine te est arida,
Sicut terra sine aqua,

sicut petra rigida,
Oculorum est pupilla
ceu crystallum frigida.

9. Sicque sicut silex dura
cuncta sunt praecordia,

Ideo non valet ulla
emanare guttula

Exque me nec saltem una
ire potest lacrima.

10. Proinde meorum multa
criminum cum milia

Sunt et plura quam arena
marina per litora

Atque multa graviora
massa exstant plumbea,

11. Clamat, ecce, supplex mea
nunc ad te miseria,

Petens, ut digneris tua
me misericordia

Hac respicere in hora
torpentem socordia.

12. Age, jam mei mollita
cordis [hac] duritia

Educ, quaeso, modo multa
lacrimarum flumina

Ad facinora deflenda
simul et flagitia.

13. Graviter peccavit mea
nam tibi dementia,

Fortiter succurrat tua
sed mihi clementia,

Quoniam est tibi tanta
ceu nulli potentia.

14. Tu es trinus unus Deus,
tu es potentissimus,

Tu es pius, tu benignus,
tu es clementissimus,

Ob hoc meis da dignatus
flumina luminibus.

15. Tu petram in stagna aquarum
convertisti laticum
Atque rupem in aquarum

fontes multiplicium,
Tu quoque potes cor meum
emollire ferreum ;

16. Tu pectus adamantinum
reddere ut carneum,

Tu mutare hunc belluinum
in humanum animum,

Veterem sive antiquum
in jam novum spiritum.

17. Ad cadendum sola mea

sufficit miseria,
Ad surgendum tua sola

sed misericordia,
Quia inest mihi multa,

proh dolor, vecordia.

18. Porrige jam lapso manum,
da luctum, da gemitum,

Dona fletum, dona planctum
ploratumque plurimum

Facque cor humiliatum,
conturbatum spiritum.

19. Plorem, pater, vehementer
te donante jugiter,
Plorem, fili patris, semper,

flagito suppliciter,
Plorem, spiritus o sacer,
te favente fortiter.

20. Lacrimer indesinenter
et incessabiliter,
Lacrimer nec non instanter,

infatigabiliter,
Ut post perpetim consoler
tecum et exbilarer.

21. Summe pater, miserere
fons misericordiae,

Miseranter tuae clemens
plasmae reminiscere

Et ad meum me adtrahe
forti Jesum robore.

22. Tuque, Domine o Christe,

o caput ecelesiae,
Attractum deposco a te

me dignanter recipe
Et receptum solidare,

in te noli spernere.

23. Tuque, spiritus o sancte
ac dulcis paraclite,

Mei semper meminisse
noli, rex, contemnere,

Sed da patrem filiumque
atque te diligere.

24. Deus trine, Deus une,
Deus clementissime,
Trinitas colenda corde,
mente atque pectore,
Unitas amanda valde
omni nobis tempore.

25. Qui es quadri diligendus
orbis in climatibus,
Sed mei plus irritatus

corporis heu sensibus,
Quam sis mundi a totius,
credo, peccatoribus.

26. Miserere, quaeso, Deus,

miserere citius,
Succurre, deposco, prius,

quam inferni abyssus
Me absorbeat, quo nullus

utilis est gemitus.

27. Respice quapropter prius,
pater, fili, spiritus,

Trine atque unus Deus,
pereat quam famulus,

Quem plasmasti tuis pius
miserando manibus.

28. Manuum tuarum opus

respice clementissimus,

Si respexeris, ploratus
sequetur uberrimus,

Immo simul ululatus
erit amarissimus.

29. Ego, pater, ille tuus
prodigus sum filius,
A [te] procul exsul factus

qui fui diu[tius]
Meretricibus conjunctus
et consumptis omnibus,

30. Quae tu bonus es largitus,
panis miser indigus

Effectus fui subulcus,
saturari cupidus

Siliquis, sed dedit nullus,
quae dabantur suibus.

31. In me autem cum reversus

nunc sum mendicissimus,

Cumque tute sciam prorsus

multis penetralibus
Mercenarios in domus
abundare panibus ;

32. Reminiscens, quod benignus
es atque piissimus,
Pietate tua fisus,

quamvis indignissimus
Nomine servi misellus
filiique penitus,

33. Advolatus clamo tuis

ejulans vestigiis:
Pater mi, peccavi nimis

in coelum miseriis
Atque coram te deliqui

gravibus et nimiis.

34. Non sum dignus dici tuus
servus nedum filius,

Sed me jam dignetur meus
pater clementissimus

Tractare sua benignus
pietate citius.

35. Eripe de portis mortis
me, pater amabilis,

Pereat ne tui juris
suis plasma meritis,

Abest panis, adest famis,
pestis miserabilis.

36. Nemo panem habet vitae
praeter te, altissime,
Quem nunc cernor esurire,

indignus percipere,
Sed gratuitus largire
tu pius hunc munere.

37. Saginatus est occisus
fratri meo vitulus,

Qui fuit peregrinatus
a patre diutius,

Cum multis luxuriatus
miser meretricibus.

38. Qui ad te ubi reversus
fuit mendicissimus,

Consumptis paternis rebus
atque bonis omnibus,

Indigens suillo victu
sed carens hoc fundatus,

39. Inops panis, dives famis,
ut est piis oculis
A longe respectus patris,

est donatus osculis,
Amplexatus et benignis
vehementer brachiis.

40. Aliud nil fuit fassus,
ni quod esset filius

Ejus ultra jam indignus,
servis a fidelibus

Prima stola est indutus,
inque manu annulus

41. Est confestim sibi datus,
tegumenta pedibus

Pariterque saginatus
est occisus vitulus,

Sicque fuit epulatus
tecum, pater, filius.

42. Ergo quia est inventus,
fuerat qui perditus,

Rediit[que] suscitatus
et revixit mortuus,

Gaudio magno gavisus
est cum servis dominus.

43. Igitur ego ipsius

nunc ad te fraterculus
Clamo tuis advolutus,
pie pater, pedibus,
Tuus, fateor, indignus
nihil minus filius.

44. Ecce, jam petit misellus
veniam sceleribus,

Pro suis offensis, quibus
te tristavit pluribus,

Quam polus ipse depictus
splendeat sideribus.

45. Ergo sicuti tunc pius
nihil eras amplius,

Clementer ejus misertus
cito currens obvius,

Miserere sic dignare
atque mei ocius.

46. Et quidem nil eo minus,
verum multo amplius

Peccavi tibi protervus
diebus ac noctibus,

Ad bonum, proh nefas, tardus,
ad malum promptissimus.

47. Justificavi misellus

meis facinoribus
Peccatores omnes, mundus

quos tenet quadrifidus,
Proinde peto prostratus

veniam sceleribus.

48. Jesu, jam quatriduanus,
bone pastor, Lazarus

Mortis in sepulcro situs
jamque nimis foetidus,

Monumento quamvis pressus,
jamjam scatens vermibus,

49. Ecce jacet interemptus
multis pro criminibus,

Quae gessit e contra stultus
signis hebetissimus,

Privatus velut ambobus
cum sensu lnminibus.

50. Freme, freme bone Jesu
ac turbare spiritu,

Lacrimare pio fletu
servi pro interitu,

Propria qui semet manu
interemit jamdiu.

51. Clama, clama, Jesu Christe,
voce magna, Domine:
Prodi foris, tumulate,
veni foras, Lazare,
Exi, exi et procede
jam de mortis carcere.

52. Si clamaveris me, Christe,
redemptor piissime,

Exibo laetus Tepente
ac procedam propere,

Que vita servum vocante
fugiet mors rapidus.

53. Ligatus manus et pedes
faciemque Lazarus
Prodiit ille antiquus
voce Dei excitus,
Sic ego, plus licet vinctus,
non prodibo tardius.

54. Fili Dei, Christe, vivi,
jube tui Lazari
Pedes, manus, ora solvi

et abire desini
Et vestigiis advolvi
sui sacris Domini.

55. Quin tibi tuoque patri,
quin sancto spiritui,

Trino Deo atque uni
corde, ore supplici

Grates agat voce tali
honore sub triplici:

56. Benedictus sit excelsus
genitor et genitus
Spiritus nec non et sanctus,

perdulcis paraclitus,
Per quem suus est [jam] servus
suscitatus Lazarus.

57. Manicis qui magnis vinctus,
constrictus compedibus

Flammis eram destinatus
poenarum ultricibus,

Quae tormentis extant prorsus
plena multiplicibus.

58. Gloriam cantabo sane
omni tibi tempore,

Si digneris evocare
mortis me de limine,

Cui est vita cum patre
et regnum cum flamine.

59. Tange, tange, Jesu Christe,
meos clementissime

Oculos et squamas inde
serpentinas ablue

Fluminaque multa valde
lamentorum eiice.

60. Actus terge et reterge,

quo plus fluant lacrimae,

Fluant nocte, fluant die,
ut possim restinguere

Flammas, quae sunt mihi jure
poenis meis debitae.

61. Spiritus o sancte, pia

respice me gratia
Et mersum mortis in urna

me, precor, vivifica
Ac vivificatum tua

luce jam illumina.

62. Gratis nam fecisti tua
me misericordia,
Gratis, flagito, reforma
demum et resuscita,
Gratis tua dantur dona,
hinc donorum gratia.

63. Memento, Domine Deus,
quod gignens et genitus,

Ut es potens atque pius,
sic tu nihilominus

Ante saecla es benignus,
mitis, potens, validus.

64. In quemcunque enim spiras,
hunc statim vivificas,

Cum patre, filio tonas,
regis et illuminas,

Gratiam cujus [tu] donas,
solidas ac vegetas.

65. Quos placet, benigne vocas,

vocatos sanctificas,
Humiles pius exaltas

et altos humilias,
Immundosque quosvis mundas,

impuros purificas.

66. Quid plura, leprosos sanas,

impios justificas,
Cum patre proleque cunctas,

quas vis, mentes recreas,
Insuper et recreatas

tu, pater, glorificas.

67. Quamobrem te, Deus pie,
postulo humillime,
Cito mihimet succurre

cum patre, cum sobole,
Et ovi nimis infirmae
gratiam jam tribue.

68. Da, precor, in te clamare
Abba, pater, Domine,

Nec non atque Jesu Christe
simul, quaeso, dicere,

Quin et te, o flatus alme,
vocare humillime.

69. Da amare, da timere,
da frequenter colere

Patrem, prolem, sanctum atque
da flatum diligere

Toto corde, tota mente,
toto nec non pectore.

70. Esto mihi timor ingens
atque amor vehemens,

Diligam te nimis timens
timeamque diligens,

Serviamque contremiscens,
contreniscam serviens.

71. Non permittas me perire
nec digneris perdere,

Quem plasmasti manu pia,
Deus, ne despicias,

Sed dignanter miserere
et clementer respice.

72. Noli, noli me delere
sed parce, piissime,

Parce, parce et defende,
clemens rex, et protege,

Protege, nec non defende
nimis pressum pondere.

73. Tuam, Deus potens, pie,
mihi manum porrige

Et dignare sublevare,
peccata dimittere

Nec non atque collocare
in coelesti requie.

74. Erue me, peto, meis,

Domine, flagitiis,
Quibus te offendi grave

retroactis saeculis
Et nunc quoque plura priscis

addo nova maculis.

75. Deduc me in viam pacis,
cum obire jusseris,
Portioque mihi lucis

tunc patescat perpetis
Merearque cum beatis
te laudare angelis.

76. Gloria, laus, honor patri,
proli ac spiritui,
Ex ambobus procedenti

ante orsus saeeuli,
Trinitati lux perennis
unitate perpeti.