220. In Adventu s. Exuperii M. Agaunensis.

1 a. Psallant regi gloriae
Gemblacenses hodie
Dulci in melodia,

1 b. Martyris egregii,
Patris Exuperii
Colentes sollemnia.

2 a. Cuius corpus inclitum
Hodie reconditum
Est in hac ecclesia,

2 b. Pro cuius praesentia,

Laetatur haec patria

Tota cum fiducia.

3 a. Hic est Exsuperius,
Patronus [egregius]
Praesentis ecclesiae;

3 b. Eius ergo precibus
Nobis datur omnibus
Spes non parva veniae,

4 a. Ut a cunctis hostibus
Erui confidimus
Eius patrocinio.

4 b. Totis ergo viribus
Nos in eius laudibus
Psallamus cum gaudio.

5 a. Hic unus Thebaeorum
Et signifer eorum
Fuit ortu nobilis,

5 b. Sed vita nobilior
Fuit atque melior
Et in fide stabilis.

6 a. Nam, dum sprevit idola
Verus ut christicola,
Necatur ab impiis;

6 b. Hic pro Christi nomine
Sacro fuso sanguine
Laetatur cum sociis.

7 a. Hic ad vitam animae
Certando legitime
Pervenit feliciter.

7 b. Principem malitiae
Armis patientiae
Superavit fortiter.

8 a. Hic ergo noster rector
Post Deum et protector
Sit in causis omnibus,

8 b. Ut eius sentiamus

Iuvamen, ut speramus,
In necessitatibus.

9. Per cuius suffragia
Vera nobis gaudia
Dentur in caelestibus.