207. De Timore.

1. Schola morum floruit,

Dum timorem habuit,

Sed timore mortuo

Statim flos emarcuit

Nec florere potuit

Mos timore defluo.

2. Timor honoris vinculum
Instruxit discipulum,

Ergo, si vis instrui,
Fer timoris iugulum
Et docentis baculum,
Quem repellunt fatui.

3. Timor laudabilium
Honor est scholarium,
Pauperes magnificat,
Timor dat imperium,
Rudium ingenium
Docet et authenticat.

4. Timor habet ordinem
Ad supernum cardinem,

Ubi nemo litigat,
Timor mansuetudinem
Excitat et turbinem

Punientis mitigat.

5. Timor et attentio
Sunt scholis in pretio,

Puer, qui assumpserit,
Puer in hoc bivio,
Si floret ingenio,

Triumphare poterit.

6. Timor est in inferis,
Quo concordant superis,

Nam sine concordia
Error est in ceteris,
Haec sunt verba veteris,

Qui timebat omnia.

7. Timor ei poculum,
Vitae habitaculum

In aeterna gloria
Dat, si hunc timuerit
Ipsumque sapuerit

Aeva per solacia.