223. De sancto Gorgonio.

1. Orbis Christe salus atque redemptor,
Nos in laude tua fac sine culpa
Hunc transire diem, quo celebratur
Festum Gorgonii martyris almi.

2. Hic pro te socio cum Dorotheo
Mundi delicias atque furorem
Contempsit procerum multiplicesque
Poenas sustinuit mente potenti.

3. Ardens igne tuo cordis in imo
Flammas non metuit sed superavit
Non tormenta timens, vincla, flagella
Constanter tolerans, prospera calcans.

4. Pugna multimoda fortiter acta,
Tandem victor init coelica regna,
Et regis quoniam spreverat aulam,
Nunc te dante tua regnat in aula.

5. Quo nos ut vitiis exoneratos
Ipsius meritis atque beandos
Carnis post obitum scandere dones
Devotis precibus, Christe, rogamus.

6. Sit cum patre tibi spirituique
Sancto, nate Dei, gloria perpes,
Virtus, imperium lausque perennis,
Qui solus moderans cuncta gubernas.