QUAESTIO UNICA.

Utrum sola paena damni debetur peccato originali ?

Alens. 2. p. q. 132. m . 10. D. Bonav. hic a. 3. q. I. D. Thom. q. 2. a. 2. Richard. a. 3. q. I. et 2. Rubion. Aegid. Durand. Marsil. Gabr. Ovando, Angles hic , et Herrera in 2. d . 27. vocant tenentes pueros puniri igne, parvulorum tortores. Bellarm. lib. 6. de statu peccati, c. 6. et 7. Suar. tom. 3. d . 57. s. 6. etd . 50. s. 5. Vasq. 1. 2. d. 134. Scot. in Oxon . hic.

Circa istam distinctionem trigesimam tertiam quaeritur primo: Utrum sola paena damni debeatur peccato originali ? Quod non, Augustinus de Fide ad Petr. 24. dicit : Parvulos non baptizatos aeterni ignis supplicio puniendos ; illa est paena sensus.

Item, parvuli non baptizati, non habebunt corpus gloriosum ; igitur possunt pati ab intrinseco et extrinseco, cum corpus eorum componatur ex contrariis ; igitur non solum puniuntur in non videndo Deum.

Item, voluntas in eis non erit confirmata in bono ; igitur possunt peccare aliis peccatis quam sit originale ; igitur habebunt aliam paenam a paena damni.

Item, si puniuntur ista paena, igitur non sola ista, quia habebunt intellectum non sic ligatum, quin poterunt intelligere naturam suam, et poterunt intelligere ad quantam beatitudinem natura eorum fuisset ordinata ; igitur ex hoc possunt tristari ; non igitur solum puniuntur in non videndo Deum.

Oppositum, Magister in littera, quod paena eorum omnium paenarum erit mitissima ; sed si haberent aliam a paena damni, hoc non esset verum.