228. De Conductu in itinere Hierosolymitano.

1. Christiani nominis

Corruit insigne,
Spurci pompa germinis

Et gentis indignae
Regnat in Jerusalem,

Quis ferro vel igne
Deleat propaginem

Sobolis malignae?

2. Capta est haereditas

Pendentis in ligno,
Si quos regit veritas

Munere benigno,
Horum crucis pectora

Consignentur signo,
Publicentur robora

Populo maligno.

3. O florens militia

Christianae gentis,
Quis ferat opprobria
Saecula regentis,
Ordinetur acies

Populi credentis,
Fabricetur aries,
Dentur vela ventis.

4. Nostrae, fratres, vigeat

Disciplinae cultus,
Pax inter nos maneat,

Sit rancor indultus,
Sentiant Jerusalem

Gentiles tumultus
Christiani roboris

Viriles assultus.

5. Cur gens non opprimitur

Vitae bestialis,
Qua sic Christi premitur

Sedes principalis ?
Factum in prostibulum

Civitas regalis,
Versa est in stabulum

Domus specialis.

6. A summo pontifice

Exiit edictum,
Neminem detineat

Scelus vel delictum,
Indulgetur penitus

Culpae maledictum,
Si quis occubuerit

Per iter indictum.

7. Vestris qui sceleribus

Estis involuti,
Piscina comparuit

Congrua saluti,
In qua quotquot sanguine

Fuerint abluti,
Laetabuntur illico

Coelum consecuti.

8. Ergo si vos moveat

Zelus domus Dei,
Rogo vos, admoneat

Illud Maccabaei,
Sub quo pauci totiens

Vicerunt Judaei,
Valde mentes acuit

Tanta form a rei.

9. Constipetur classibus

Maris latitudo,
Plebs, Quirites, proceres,

Regum celsitudo,
Ire si quem hostium

Terret multitudo,
Noverit, quod desuper

Datur fortitudo.

10. Surgat invincibilis

Pastor Romanorum,
Accingatur nobilis

Probitas Francorum,
Producatur agilis

Populus Anglorum
Nec non et horribilis

Turba Bohemorum.

11. Sedens adhuc modicum

Cinere conspersa
Tuum lauda medicum,

Civitas dispersa,
Ad te nostra convolat

Gens bene conversa,
Ut jam te non incolat

Medus neque Persa.

12. Ad hoc sulcant aequora

Plus quam rates mille,
Plenae gente libera

Mentis non pusillae,
Ni gurges impediat

Charybdis et Scillae,
Tutum est, ut fugiat

Filius ancillae.

13. Ergo nunc accelerent

Fortes regionum,
Cedat amor sanguinis

Et cognationum,
Aderit in proelio

Deus ultionum,
Cujus cadet brachio

Robur nationum.