226. De sancto Francisco.

1 a. Vergente mundi vespere
Summi regis de latere
Novus legatus mittitur,

1 b. Novo ditatus munere
Franciscus novo foedere
Dei salus efficitur.

2 a. Hic a Deo revocatur

Et in annis praesignatur
Sibi datis caelitus

2 b. Hostis nostri debellator,

Verus crucis aemulator,

Magni dux exercitus.

3 a. Paupertatis formam tenens,
Christi vitae modum gerens
Ut vir apostolicus,

3 b. Verbis vitae nos replevit,
In quo duplex requievit
Spiritus prophetiae.

4 a. Hic exorans mundi scelus,
Quem succendit fervens zelus
Crucis et martyrii,

4 b. Christi fidem exaltavit,
Quam Soldano praedicavit
Cursu ministerii.

5 a. Hic inspector secretorum,
Quem demulcent angelorum
Sacra ministeria.

5 b. Cunctae Christi creaturae
Nutu parent, et scripturae
Panduntur mysteria.

6 a. In hoc mire renovantur,
In hoc vere demonstrantur
Redemptoris munera.

6 b. In hoc clarent mira signa,
Quae extollunt laude digna
Larga Dei munera.

7 a. O Francisce, lux solaris
Crucifixi singularis,
Fac consortes civium,

7 b. Quibus nunc associans,
Quibus iam congloriaris
In choro caelestium.