QUAESTIO CXVII.

Utrum habuerit genera linguarum?

Sequitur : Alii genera linguarum . Quod autem hanc gratiam non habuerit in summo, videri potest :

Linguae enim in signum sunt non fidelibus, sed infidelibus . Sed ipsa fidelissima fuit : ergo donum linguae non debuit habere.

2. Item, Ipsa non debuit praedicare : ergo non debuit donum linguae habere. Item, Glossa, ibidem : " Ut euntes per mundum intelligant linguas hominum. " Sed ipsa non debuit sic ire per mundum : ergo non debuit habere donum linguarum.

Sed contra :

1. Ipsa est advocata omnium : ergo debet scire linguas singulorum.

2. Item, Act. ii, 3 : Seditque supra singulos eorum Spiritus sanctus : sed ipsa fuit cum eis quando apparuerunt dispertitae linguae tamquam ignis : ergo accepit donum linguae cum ipsis.

3. Item, Cum diversis hominibus conversabatur : ergo indiguit dono linguae.

4. Item, A nullo illustrium vincitur in aliquo : ergo habuit donum istud omnibus aliis excellentius .