229. De s. Gertrude Nivellensi.

1 a. Laetabundus

Gertrudi decantat chorus
Alleluia.

1b. Regem regum

Dilexit nec virum novit,
Res miranda.

2 a. Omnem fastum respuit,
Illi natus placuit
Sol de stella.

2 b. Orta de nobilibus,
Sed magis virtutibus
Semper clara.

3 a. Ut vult Deus, oleum
Servavit virgineum
Pari forma.

3 b. Nullo maculamine,
Nullo viri semine
Fit corrupta.

4 a. Illam rexit caritas
Et mentalis sanctitas
Valle nostra.

4 b. Nunc regnat in gaudio,
In aureo scrinio
Carne sumpta.

5 a. Hac auditus redditur,
Claudus recte graditur,
Hac videt, quae cernitur
Esse caeca.

5 b. Miris fulget pluribus,
Succurrit ardentibus
Et multis languentibus
Haec praedicta.

6 a. Virgo mellifera,
Absterge scelera,
Tibi supplicat
gens misera.

6 b. Duc nos in aethera
Nosque refoedera,
Quem genuit
puerpera.