233. De s. Iohanne Baptista.

1. Salve, Iohannes sancte,

Baptista reverende,
Inter sanctos ceteros

merito praeferende,
Post Christum et Mariam

praecipue colende,
Pro nobis preces Domino

iugiter impende.

2. Gaude, qui per angelum

coannuntiatus,
Priusquam concipereris,

Iohannes nominatus,
In ventre tuae matris

conceptus et sacratus,
In nobis tuis precibus

sit Christus hospitatus.

3. Gaude, quia nomen per

ortum tibi datur
Iohannes, Dei gratia

quod interpretatur,
Pater pius et mutus

prophetando fatur,
Divina nobis gratia

per te concedatur.

4. Gaude, quia iuvenis

eremum petisti
Utriusque sexus

turmasque fugisti,
Peccato consentire

qui [non] voluisti,
Fac culpas nos odire,

sicut tu odisti.

5. Gaude, quia carnem

tuam domuisti,
Cum mel et locustas

sponte comedisti,
Nec sicerae nec vini

pocula bibisti,
Fac, ut simus sobrii.

qui sic abstinuisti.

6. Gaude, quia Domino

viam praeparasti,
"Paenitentiam agite"

quando praedicasti,
"Regnum Dei prope est,"

Iudaeis nuntiasti,
Fac nos paeniteri

vitando, quod vitasti.

7. Gaude, quia Iesum

digito demonstrasti,
"Ecce, agnus Dei"

dicens proclamasti,
In flumine Iordanis

Christum baptizasti,
Fac nobis hunc propitium,

quem tunc honorasti.

8. Gaude, quia Herodem

tu redarguisti,
Quem fratris uxorem

duxisse tu scivisti,
Capitis sententiam

propter hoc subisti,
Nos vitam fac finire

in caritate Christi.

9. Gaude, qui post mortem

ad limbum descendisti
Ac exsistentes ibi

vere praemunisti,
Quod essent exituri

in adventu Christi,
De barathro nos eripe

eius[que] poena tristi.

10. Gaude, quia redemptor

pius populorum
Extraxit post ab inferis

[patriarcharum chorum]
Secumque reduxit

ad gaudia caelorum,
Fac nos gaudere secum

precibus illorum.