232. De octo principalibus vitiis.

1. Gastrimargia est primum

principale vitium,
Quodque corpori si satum

haeserit intrinsecus,
Plura prodeunt nefanda

de ramorum fructibus.
2. Nostris placuit vocare

hanc ventris ingluviem
Commessationes fluxas

atque detestabiles,
Quae cum fuerint in nobis

excitant libidines.
3. Fornicatio de gula

et de ventris crapula
Propagata mala, blanda,

impudens, turpissima,
Membra nostra, nae, quod absit,

meretricis faciat.

4. Radix omnium malorum

exstat philargyria,
Amor est pecuniarum,

quae est avaritia,
Salvatorem ipsa nostram

vendidit cupiditas.
5. Irae vitium tollendum,

quod est menti noxium,
Sol justitiae per iram

quia si occiditur,
Hosti nostro ad nos datur

facilis introitus.
6. Cui fuerit innixus

spiritus tristitiae,
Obfuscata mente passim

per incursus varios,
Corde caeco sic discurrit

velut sensu ebrius.

7. Sicut enim vestimentum
tinea demolitur,

Et a vermibus conrosum
saepe lignum teritur,

Sicque morsibus vastata,
tristis mens perimitur.

8. De injuriis illatis

deque lucro perdito
Aequo animo estote,

quia pius Dominus,
Poenitentum salus ipse
et redemptor omnium.

9. De acidia procedit
mentis instabilitas,

Otiositatis telo
sauciatur anima,

Cordis taedio et somno
semper manet anxia.

10. Genodoxiae vitemus
letale contagium,
Si quid boni operamur,
ut a Deo praemium
Mereamur et fruamur
bonis in perpetuum.

11. Ista quoque Ezechiam
post tanta praeconia

Regem adit, superavit,
fregit vana gloria,

Quemque hostis non prostravit,
superavit vanitas.

12. De superbia contemptus,
murmur et invidia,

Haereses, contentiones,
inobedientia,

Oriuntur mala cuncta
paene cum jactantia.

13. In occulto mens elata

prius cum tumuerit,

Velut vipera, maternis

disruptis lateribus,
De barathro sui cordis
verba spargit vocibus.

14. Maxime humanum genus
per mentis superbiam
Hosti subditur antiquo
et carnis luxuriam,
Cujus nos de fauce trahat
infinita pietas.

15. Quisquis istis vacuatus

fuerit a vitiis,
Mansionem Deo parat

in suis praecordiis,
Regnaturus in aeternum

cum electis angelis.