230. De s. Gertrude Nivellensi.

1 a. Virginis egregiae
Memoriam hodie
Celebret ecclesia,

1 b. Cui dum mundus viluit,
Castitate floruit
In caelesti gloria.

2 a. Aetate iuvencula
Spreta viri copula
Tendit ad perennia.

2 b. Ante reges sistitur,
De nuptiis agitur
Grandis controversia.

3 a. Ducis adest filius
Promittens instantius

Aurum, gemmas, praedia,

3 b. Iactat, genus, redditus,
Virgo spernit penitus
Et profatur talia:

4 a. "Deum unum eligo,
Totum mundum abigo
Et, quae sunt mortalia.

4 b. "Me ditavit osculo,
Subarrhavit annulo,
Qui regit caelestia."

5 a. Gertrudis constantia,
Quidquid mundi gloria
Confert, hoc repudiat.

5 b. Materno consilio
Cum ferro tonsorio
Crine caput spoliat.

6 a. Deformata saeculo
Virgo corde sedulo
Respuit praesentia.

6 b. Tum sacri velaminis

Cum curae regiminis

Sublimatur gratia.

7 a. Voluptatem superat,
Affligit et macerat
Corpus abstinentia.

7 b. Carnis mole libera
Transfertur ad supera
Beatorum gaudia.

8 a. Caecus, surdus, languidus,
Quos laxarat invidus,
Per eius suffragia

8 b. Videt, audit, ambulat
Et laudando cumulat
Virginis magnalia.

9. Tuo, virgo, nomini
Ad honorem Domini
Canimus Alleluia.