234. De s. Iohanne Baptista.
Ad Matutinum.

1. Dulce melos tangat caelos
In Iohannis praeconio,
Cuius pater, sic et mater
Nomen tangunt praesagio.

2. Gabrielis vox de caelis
Dubitanti Zachariae
Hunc futurum nasciturum
Promit cum vitae serie.

3. Sidereo regi Deo

Laus, honor, virtus, gloria,
Qui nos ducat et perducat
Ad caelorum palatia.

Ad Laudes.

1. Gaudet coetus noster laetus
Christummundi redemptorem,
Agonistam qui baptistam
Suum fecit praecursorem.

2. Dum non credit, vox recedit
Zachariae, sancti patris,
Sensit plausus adhuc clausus
In utero suae matris.

3. Sidereo regi Deo.

Ad Primam.

Mundi sator et plasmator
Tui praeconis munere

Te laudare, te amare
Fac nos et tecum vivere.

Ad Tertiam.

Catechizans et baptizans
Iohannes paenitentiam

Diligebat et colebat

Prae cunctis innocentiam.

Ad sextam.

Eremita, tua vita

Exemplum est munditiae
Ad pulsandum, detestandum

Crimen impudicitiae.

Ad Nonam.

Iuvans prece nos a nece
Dira, Iohannes, eripe,

Pugil fortis, hora mortis
Hanc plebem tuam suscipe.

Ad Vesperas.

1. Dignus laude martyr, gaude,
Virgo baptizans Dominum,
Doce formam, trade normam
Delendi sordes criminum.

2. Salus praesto nobis esto
Virtutis donans meritum,
Hic gratiam et gloriam
Nobis post noe exsilium.

3. Sidereo regi Deo.
Ad Completorium.

1. Tu signifer, tu lucifer

Praecurrens ante Dominum,
Ad quem ire fac secure
Nos per saeculi terminum.

2. Sidereo regi Deo

Laus, honor, virtus, gloria,
Qui nos ducat et perducat
Ad caelorum palatia.