236. De sancto Iohanne Evangelista.
Ad Matutinum.

1. O Iohannes amabilis,
Apostole mirabilis,
Vir valde venerabilis,
Sis nobis favorabilis.

2. Iohannes virgo, ceteris
Dilectior apostolis,
Sacer, plenus dulcedinis,
Custos beatae virginis.

3. Ora pro nobis iugiter,
Instanter ac salubriter,
Ut tecum simus pariter
In caelis aeternaliter.

Ad Laudes.

1. Evangelista fulgidus
Johannes et apostolus
Tollat a nobis noxia
Et ducat ad caelestia.

2. Maria, mater inclita,
Virginitate praedita,
Cum virgine discipulo
Nobis succurrat sedulo.

Ad Primam.

1. Iohannes apostole,
Evangelista fulgide,
Tuis devotis subveni
Cum sacra matre Domini.

2. Tibi, Iesu, rex omnium,
Laus, honor et imperium,
Per Iohannem apostolum
Duc nos ad caeli gaudium.

Ad Vesperum.

1. Iohannes amantissime,
Cum genetrice virgine
Fac nobis eius filium
Semper fore propitium.

2. Succurre nobis omnibus
Tuis sacratis precibus,
Per hanc tui memoriam
Duc nos ad caeli gloriam.