239. De sancta Katharina.

1. Katherina, gemma clara,
Sponsa summi regis cara,
Secretorum Dei gnara,
Castitate florida.

2. A regali stirpe nata,
In virtute solidata,
Mente sagax, forma grata,
In sermone provida.

3. Tot virtutibus protecta,
Ad calcandum es electa,
Contra Dominum erecta
Colla regum turgida.

4. Hanc Maxentius tormentis,
Minis, probris, blandimentis
Nisus est a firmae mentis
Trabere constantia.

5. Exsufflavit blanditores,
Sprevit Caesaris tortores,
Fatuati sunt doctores
Virginis prudentia.

6. Roboratur Deo plena
Fides martyris in poena,
Fractis rotis cum catena
Triumphavit omnia.

7. Imminente die mortis
Decollatur virgo fortis,
Manu caelicae cohortis
Sepulturae traditur.

8. Nunc exuta corruptelis,
Dives meritis, in caelis
Pro terrestribus fidelis
Advocata creditur.

9. Alma virgo Katherina,
Tuis famulis propina
De caelesti medicina,
Quae de te dispergitur.