235.

1. Ave, virgo Maria,
Genitrix propitia

Regis regum omnium,
Ave, plena gratia,
Quae in coeli curia
Sedes juxta filium.

2. O clemens puerpera,
Quam nova et vetera

Benedicunt carmina,
Tu polo et aethera
Et in mundi infera
Veneraris machina.

3. O pincerna veniae,
Fons misericordiae,

Tecum manet Dominus
Coelestis militiae,
Qui sub servi specie,
Mundi lavit facinus.

4. O virgo Davidica,
Tua quam glorifica

Cunctis est assumptio,
Pro qua promit cantica
Exsultans angelica

Paradisi concio.

5. O humani generis
Spes et arca foederis,

Tu in mulieribus
Benedicta, miseris
Coeli portam aperis

In te confitentibus.

6. O regina virginum,
Super culmen ordinum

Coelestium posita,
Per te sordes criminum
Assequuntur terminum
Vita jugi reddita.

7. O Maria, effice

Tua prece supplice,

Ut benedictus tui
Fructus ventris apice
Mansionis coelicae

Praestet nobis perfrui.