243. De s. Johanne Gualberto.
Ad Laudes.

1. Johannes, clarus genere,
Pudicus mundo claruit,
Quem suo Christus munere
Salutis iter docuit.

2. Vitae Johannes studuit
In umbra solitariae,
Spem suam nunquam posuit
Mundiali laetitiae.

3. Quanti sanctus sit nominis,
Testetur ille mortuus,
Nexu solutus criminis
Qui coelo est continuus.

4. Patri Johanni fabrica
Domorumque displicuit
Terrae, statim fit ruica,
Si parvus rivus influit.

5. Pater perfectus gratia,
Decus Christi ecclesiae,
Angelica praesentia
Spiritum reddit gloriae.

6. Ad patris sancti tumulum
Qui populus convenerat,
Sumit abundans ferculum,
Quod modicum invenerat.

7. Febre vexata nimia,
Quae tumulo prosternitur,
Stat sana Christi gratia,
Johannes dum requiritur.

8. Detentos a daemonibus
Ejus sacratum brachium
Sanat et confert omnibus
Magnum salutis gaudium.

9. Sit trinitati gloria,
Honor, decus, imperium,
Sint nobis coeli gaudia
Per Johannis suffragium.