241. De sancto Hieronymo.

1 a. Gaude, doctor spiritalis,
Et interpres triumphalis,
Vere digne cardinalis
Presbyter Ieronyme.

1 b. Gaude, quem papatu dignum
Cuncti clamant, sed malignam
Falsi fratres ponunt signum,
Vestem noctu feminae.

2 a. Gaude, vasta per deserta
Antra quaerens inexperta,
Claustra figens ibi certa,
Loca paenitentiae.

2 b. Gaude, domitans leonem
Fractrum faciens calonem,
Qui et praedam et praedonem
Revocat cautissime.

3 a. Gaude, servans castitatem
Et Eustochium magnatem
Firmans, ut virginitatem
Servet intactissimae.

3 b. Gaude, qui, quod concupisti,
Obtinere meruisti,
Felix ad praesaepe Christi
Et mori et vivere.

4 a. Gaude, lex et principatus,
Dux et lux beati status
Et Iohanni comparatus
Augustino iudice.

4 b. Fac nos dignos te laudare
Et laudantibus dignare
Laetas sedes impetrare
Supernalis gloriae.