242. De s. Hilario Pictaviensi.

1 a. Christo, regi gloriae,
Canticum laetitiae
Concinat eximie
Plebs fidelis,

1b. Qui iubar ecclesiae,
Pastorem Pictaviae,
Hilarium hodie
Reddit caelis.

2 a. Ergo sacro praesuli
Christi dicant servuli:
Doctor, ave, populi,
Spes reorum,

2 b. Tu tegmen piaculi,
Tu salus periculi,
Tu nubes umbraculi
Miserorum.

3 a. Sub Caesare devio
A fide Constantio,
Haeresis contagio,
Morte spreta

3 b. Restitisti noxio,
Iussu cuius impio
Damnaris exsilio
Mente laeta.

4 a. Tuam Apram filiam
Viro tollens sociam
Christo sponsam aliam
Praeparasti.

4 b. Gentilem Florentiam,
Parentes, familiam
Ad lavacri gratiam
Revocasti.

5 a. Tuum ad imperium

Tremens fugit anguium
Incolis nocentium
Praesentia.

5 b. Matris augens gaudium
Suscitasti filium
In conspectu gentium
Prece pia.

6 a. Cum tot signa feceris,
Lux, Hilari, sideris,
Suffragare miseris
Mortis hora.

6 b. Qui tuos non deseris,
Fac, iungamur superis,
Quibus gaudet aetheris
Urbs decora.