247. De sancta Katharina.

1. O beata Katherina,

Virgo clemens et benigna,
Per te possim ad divina
Pervenire gaudia.

2. Katherina, virgo pia,
Cuius fideli sophia
Doctorum philosophia
Vana fuit et confusa,
Deum mihi pacifica.

3. Katherina, virgo casta,
Virgo prudens et honesta,
Virgo mitis et modesta,
Roga Deum, ut lamenta
Mea vertat in gaudia.

4. Katherina, templum Dei,
Per te sumpserunt fidei
Veritatem philosophi,
Per te salvi sunt effecti
Et in caelis coronati.

5. Per te, virgo specialis,
Sim a cunctis liber malis,
A delictis liberatus
Et in caelis collocatus
Tuis patrociniis.

6. Katherina, lumen clarum
Et lucerna puellarum,
Virginale speculum,
Praecellens carbunculum,
Me salva, tuum famulum.

7. Katherina, Dei templum,
Castitatis es exemplum,
Da virtutis indumentum.
Sanctitatis incrementum
Verae lucis radium.

8. Katherina, virgo sancta,
Quae pro tuo servitio,
Caeli gaudes palatio,
Roga Deum corde toto,
Ut me sumat [suo] regno.

9. Katherina, vas decorum,
Servitutem idolorum
Quae sprevisti, domino[rum]
Regem Deum et deorum
Coluisti, sempiternum
Da mihi solacium.

10. O beata Katherina,
Quae mortis supplicia
Pro Christo non minima
Tolerasti, tolle mea
Deo iuvante crimina.

11. Katherina, virgo pia,
Quae caeli gaudes curia.
Roga Deum, ut in sua
Me captivum gloria
Coronet in laetitia.

12. Quod praestare tu digneris,
Invocantes quae tueris,
Quae laudari promereris,
Quae regentem intueris
Per saeculorum saecula.