Sermo II.

Dominica quarta post Pascha. Sermo fratris Bonaventurae in provinciali Capitulo Aragoniae.

Cum venerit ille Spiritus veritatis, docebit vos omnem veritatem, Ioannis decimo sexto .

Salvator noster, Dominus Iesus, commendat hic novae legis gratiam, ad quam nos adoptavit, a tribus, scilicet ab inspirantis benignitate, ab eiusdem perspicacitate et doctrinae liberalitate seu disciplinae universalitate. Primum, ibi: Cum venerit ille; secundum, ibi: Spiritus veritatis; tertium, ibi: docebit vos omnem veritatem.

I. Circa primum nota, quod Spiritus sanctus magister est, et ideo non solum ad intelligendum, sed suggerit ad volendum et adiuvat ad exsequendum; propter quae tria dicitur: Spiritus veritatis, quia docet ad intelligendum; Ioannis decimo quinto: Cum venerit Paracletus, quem ego mittam vobis, Spiritum veritatis, ille testimonium perhibebit de me etc.

Spiritus sanctitatis, quia movet ad bene volendum; Ioannis decimo quarto: Paracletus autem Spiritus sanctus, quem mittet Pater in nomine meo, ille vos docebit omnia et suggeret vobis omnia, quaecumque dixero vobis.

Spiritus virtutis, quia adiuvat ad operandum; Actuum primo : Accipietis virtutem supervenientis Spiritus sancti in vos etc.

II. Venit autem ille Spiritus, ubi amatur; Ioannis decimo quarto : Si quis diligit me, sermonem meum servabit, et Pater meus diliget eum, et ad eum veniemus et mansionem apud eum faciemus.

Ubi invitatur; Sapientiae septimo: Invocavi, et venit in me spiritus sapientiae etc.

Ubi exspectatur; Habacuc secundo: Si moram fecerit, exspecta illum, quia veniens veniet et non tardabit.

III. Docet autem ille Spiritus omnem veritatem, agendam; Isaiae trigesimo octavo : Obsecro, Domine, memento, quaeso, quomodo ambulaverim coram te in veritate et in corde perfecto.

Contemplandam; Matthaei vigesimo secundo: ''Scimus, quia verax es et viam Dei in veritate doces.

Iudicandam; Proverbiorum decimo octavo: Accipere personam impii non est bonum, ut declines a veritate iudici i''.